19–31 ந்தேதி வரை நடைபெறும் போட்டியின் 6 வது நாள்
சென்னை, ஜன. 24–
‘கேலோ இந்தியா’ விளையாட்டுப் போட்டிகளின் 6 வது நாளில் தமிழ்நாடு அணி 12 தங்கப்பதக்கங்களை பெற்று புள்ளிப் பட்டியலில் 2 வது இடத்தை பெற்றுள்ளது.
இந்திய ஒன்றிய அரசு திட்டத்தின் கீழ் கேலோ இந்தியா விளையாட்டு போட்டிகள் கடந்த 2018 ஆம் ஆண்டு முதல் நடத்தப்பட்டு வருகிறது. இந்தியாவில் பல்வேறு மாநிலங்களில் நடத்தப்பட்ட இந்த போட்டியானது, இந்தாண்டு தமிழ்நாட்டில் உள்ள சென்னை, கோவை, மதுரை, திருச்சி ஆகிய 4 மாவட்டங்களில் நடைபெறுகிறது. 18 வயதுக்குட்பட்டவர்கள் பிரிவில் நடத்தப்படும் இந்த கேலோ இந்தியா விளையாட்டு போட்டிகள், ஜனவரி 19ஆம் தேதி தொடங்கி ஜனவரி 31 ந்தேதி வரை நடைபெற உள்ளது.
தமிழ்நாடு 2 வது இடம்
விளையாடு இந்தியா என்ற பெயரிலான இந்த போட்டிகள் தொடங்கிய 6 நாளில், தமிழ்நாடு சார்பில் பங்கேற்ற வீரர், வீராங்கனைகள் 12 தங்கப் பதக்கம், 3 வெள்ளிப் பதக்கம், 16 வெண்கலப் பதக்கம் என மொத்தம் 31 பதக்கங்களை வென்று புள்ளிப் பட்டியலில் 2 வது இடத்தை பிடித்துள்ளது. மகாராஷ்டிரா மாநிலம் 14 தங்கம், 15 வெள்ளி, 16 வெண்கலம் என மொத்தம் 45 பதக்கங்களுடன் முதல் இடத்தை பிடித்துள்ளது. அரியானா மாநிலம் 7 தங்கம், 6 வெள்ளி, 19 வெண்கலம் என மொத்தம் 32 பதங்கங்களுடன் 3 வது இடத்தை பிடித்துள்ளது. 4 வது இடத்தில் உள்ள டெல்லி, 7 தங்கம், 6 வெள்ளி, 6 வெண்கலம் என மொத்தம் 19 பதக்கங்களை வென்றுள்ளது. 5 வது இடத்தில் உள்ள பஞ்சாப் மாநிலம் 6 தங்கம், 5 வெள்ளி, 7 வெண்கலம் என மொத்தம் 18 பதக்கங்களை வென்றுள்ளது.
6 முதல் 20 வரையான இடங்கள்
6 வது இடத்தில் உள்ள குஜராத் 5 தங்கத்துடன் மொத்தம் 9 பதங்கங்களையும், மணிப்பூர் 4 தங்கத்துடன் மொத்தம் 15 பதக்கங்கள் பெற்று 7 வது இடத்தையும், மேற்குவங்கம் மொத்தம் 11 பதக்கங்களுடன் 8 வது இடத்தையும் உத்தரபிரதேசம் மொத்தம் 10 பதங்கங்களுடன் 9 வது இடத்தையும் தெலங்கானா மொத்தம் 6 பதக்கத்துடன் 10 வது இடத்தையும் பிடித்துள்ளது.
ராஜஸ்தான், கேரளா, சண்டிகர், மத்திய பிரதேசம், ஜம்மு காஷ்மீர், கர்நாடகா, ஆந்திரா, இமாச்சல் பிரதேசம், ஒடிசா, பீகார் மாநிலங்கள் புள்ளிப்பட்டியலில் முறையே 11 முதல் 20 வது இடங்களை பிடித்துள்ளது. ஜார்கண்ட், திரிபுரா, உத்தரகாண்ட், அருணாச்சலப் பிரதேசம், சத்தீஸ்கர் மாநிலங்கள் புள்ளிப்பட்டியலில் 21 முதல் 25 வரையான கடைசி 5 இடங்களை பிடித்துள்ளது.
இந்த கேலோ இந்தியா போட்டிகளில் 26 விளையாட்டுகள் இடம்பெறுகிறது. 26 போட்டிகளில் மொத்தம் 933 பதக்கங்கள் இடம் பெற்றுள்ளது. அதில் 278 தங்கம், 278 வெள்ளி, 377 வெண்கலப் பதக்கங்களை பெற, 36 மாநிலங்கள் மற்றும் யூனியன் பிரதேசங்களை சேர்ந்த சுமார் 6000 விளையாட்டு வீரர்கள், வீராங்கனைகள் பங்கேற்றுள்ளனர். முதல் நாளிலேயே, தமிழ்நாடு அணி சார்பில் யோகா போட்டியில் பங்கேற்ற சர்வேஷ், தேவேஷ் இணை, முதல் தங்கப் பதக்கத்தை வென்று சாதனை படைத்தது குறிப்பிடத்தக்கது.
