செய்திகள்

தீவிரமடையும் போராட்டம்: டெல்லியில் மேலும் குவியும் பஞ்சாப் விவசாயிகள்

புதுடெல்லி, டிச.11–

மத்திய அரசு கொண்டுவந்த 3 விவசாய சட்டங்களை திரும்ப பெறக் கோரி வடமாநில விவசாயிகள் டெல்லியில் முற்றுகை போராட்டத்தில் ஈடுபட்டுள்ளனர்.

இன்று 16-வது நாளாக போராட்டம் நடைபெற்று வருகிறது. விவசாயிகள் தங்கள் போராட்டத்தை கைவிட வேண்டும் என்று மத்திய அரசு வற்புறுத்தி வருகிறது. இதற்காக விவசாய பிரதிநிதிகளிடம் இதுவரை 5 சுற்று பேச்சுவார்த்தைகள் நடத்தி உள்ளது.

3 சட்டங்களிலும் பல திருத்தங்களை கொண்டு வர மத்திய அரசு முன்வந்தது. குறிப்பாக 7 அம்ச சமரச திட்டங்களை மத்திய அரசு முன்வைத்தது. ஆனால் அதை விவசாயிகள் ஏற்கவில்லை.

3 சட்டங்களையும் கண்டிப்பாக வாபஸ் பெற்றே தீரவேண்டும் என்று கூறி வருகிறார்கள். அந்த பிரச்சினைக்கு 10-ந் தேதிக்குள் (நேற்று) தீர்வு காண வேண்டும் என்று விவசாயிகள் கெடு விதித்திருந்தனர்.

நேற்றுடன் அவர்களுடைய கெடு முடிந்தது. இதனால் போராட்டத்தை மேலும் தீவிரமாக்கி இருக்கிறார்கள். 14-ந் தேதி டெல்லியை முழுமையாக முற்றுகையிடப் போவதாகவும், டெல்லிக்கு வரும் அனைத்து சாலைகளையும் முற்றுகையிடப் போவதாகவும் அவர்கள் அறிவித்துள்ளனர். இதனால் டெல்லி முடங்கும் அபாயம் ஏற்பட்டுள்ளது.

இந்த போராட்டத்தில் பஞ்சாப் மாநில விவசாயிகள் அதிகளவில் பங்கேற்று உள்ளனர். போராட்டத்தை தீவிரப்படுத்தும் வகையில் பஞ்சாப்பில் இருந்து இப்போது மேலும் ஏராளமான விவசாயிகள் டெல்லி நோக்கி வந்த வண்ணம் உள்ளனர்.

இதனால் போராட்டம் மோசமான நிலையை எட்டும் என்று எதிர்பார்க்கப்படுகிறது. இதை சமாளிக்க மத்திய அரசு தேவையான ஏற்பாடுகளை செய்து வருகிறது.

இது குறித்து அமைச்சர் நரேந்திரசிங் தோமர் கூறும்போது, ‘‘நாங்கள் திறந்த மனதுடன் விவசாயிகளுடன் பேசி வருகிறோம். அவர்கள் போராட்டத்தை கைவிட வேண்டும்’’ என்று கூறியுள்ளார்.

ரெயில் மறியல்

ஆனால் மத்திய அரசின் கோரிக்கையை ஏற்க மறுக்கும் விவசாயிகள், அடுத்ததாக அனைத்து இடங்களிலும் ரெயில் மறியல் போராட்டத்தை நடத்தப்போவதாகவும் அறிவித்துள்ளனர். அத்துடன் விவசாயிகள் போராட்டத்தை நாடு தழுவிய போராட்டமாக மாற்ற திட்டமிட்டு இருக்கிறார்கள்.

Leave a Reply

Your email address will not be published. Required fields are marked *