செய்திகள்

தமிழகத்தில் 4 ஆயிரத்துக்கும் கீழ் குறைந்த கொரோனா சிகிச்சை

சென்னை, மார்ச்.3-

தமிழகத்தில் தற்போது 3 ஆயிரத்து 997 பேர் கொரோனாவுக்கு சிகிச்சை பெற்று வருகின்றனர்.

தமிழகத்தில் நேற்றைய (செவ்வாய்கிழமை) கொரோனா பாதிப்பு குறித்து சுகாதாரத்துறை வெளியிட்டுள்ள செய்திக்குறிப்பில் கூறப்பட்டிருப்பதாவது:-

தமிழகத்தில் நேற்று ஒரே நாளில் 50 ஆயிரத்து 51 பேருக்கு கொரோனா பரிசோதனை மேற்கொள்ளப்பட்டது. இதில் 284 ஆண்கள், 178 பெண்கள் என மொத்தம் 462 பேர் கொரோனாவால் பாதிக்கப்பட்டு உள்ளனர். அதிகபட்சமாக சென்னையில் 167 பேரும், கோவையில் 39 பேரும், செங்கல்பட்டில் 33 பேரும், குறைந்தபட்சமாக கரூர், திருவண்ணாமலை, தூத்துக்குடி, தர்மபுரி, ராமநாதபுரம், விருதுநகரில் தலா இருவரும், அரியலூர், பெரம்பலூர், கள்ளக்குறிச்சியில் தலா ஒருவரும் பாதிக்கப்பட்டு உள்ளனர். திருப்பத்தூரில் நேற்று புதிதாக பாதிப்பு இல்லை.

தமிழகத்தில் இதுவரை ஒரு கோடியே 72 லட்சத்து 63 ஆயிரத்து 648 பேருக்கு கொரோனா பரிசோதனை மேற்கொள்ளப்பட்டு உள்ளது. இதில் 8 லட்சத்து 52 ஆயிரத்து 478 பேர் பாதிக்கப்பட்டு உள்ளனர். இதில் 5 லட்சத்து 15 ஆயிரத்து 74 ஆண்களும், 3 லட்சத்து 37 ஆயிரத்து 369 பெண்களும், 3-ம் பாலினத்தவர்கள் 35 பேரும் அடங்குவர். இந்த பட்டியலில் 12 வயதுக்குட்பட்ட 31 ஆயிரத்து 259 குழந்தைகளும், 60 வயதுக்கு மேற்பட்ட ஒரு லட்சத்து 15 ஆயிரத்து 535 முதியவர்களும் இடம் பெற்றுள்ளனர்.

தமிழகத்தில் நேற்று கொரோனாவுக்கு ஒருவர் மட்டுமே உயிரிழந்து உள்ளார். சென்னை கீழ்ப்பாக்கம் அரசு மருத்துவமனையில் கடந்த 26-ந் தேதி கொரோனாவால் பாதிக்கப்பட்ட 74 வயது பெண் சிகிச்சைக்காக அனுமதிக்கப்பட்டார். அங்கு அவருக்கு தீவிர சிகிச்சை அளிக்கப்பட்டு வந்தது. இந்த நிலையில் அவர் சிகிச்சை பலனின்றி உயிரிழந்தார். தமிழகத்தில் இதுவரையில் 12,502 பேர் உயிரிழந்து உள்ளனர்.

கொரோனா பாதிப்பில் இருந்து 473 பேர் நேற்று குணமடைந்து ‘டிஸ்சார்ஜ்’ செய்யப்பட்டு உள்ளனர். இதுவரையில் தமிழகத்தில் 8 லட்சத்து 35 ஆயிரத்து 979 பேர் கொரோனாவில் இருந்து பூரண குணம் அடைந்து உள்ளனர். தற்போது தமிழகத்தில் 3 ஆயிரத்து 997 பேர் சிகிச்சையில் உள்ளனர்.

இவ்வாறு அதில் கூறப்பட்டுள்ளது.

Leave a Reply

Your email address will not be published. Required fields are marked *