செய்திகள்

பிறந்த குழந்தையுடன் வீடின்றி தவித்த பெண்ணுக்கு கலெக்டர் நிதி உதவி

கோவை, நவ.22 –

மூணாறு பகுதியைச் சேர்ந்த ரமேஷ்- கயல்விழி தம்பதியினர், திருப்பூரில் வேலை செய்து வந்தனர். இந்நிலையில் கயல்விழி பிரசவத்திற்காகக் கோவை அரசு மருத்துவமனையில் அனுமதிக்கப்பட்டிருந்தார். இந்த நேரத்தில், மூணாற்றில் ஏற்பட்ட நிலச் சரிவில் ரமேஷ் -கயல்விழியின் தாய் தந்தை உறவினர்கள் அனைவரும் உயிரிழந்து விட்டனர். இதற்கிடையே கயல்விழிக்கு பெண் குழந்தை பிறந்தது. பிரசவத்தைத் தொடர்ந்து கயல்விழியை டிஸ்சார்ஜ் செய்து கொள்ளும்படி மருத்துவமனை சார்பில் அறிவுறுத்தப்பட்டது. ஆனால் மூணாறு நிலச்சரிவில் வீடுகள் அனைத்தும் இடிந்து விழுந்ததால் எங்கும் செல்ல முடியாமல் ரமேஷ்-கயல்விழி தம்பதி தவித்தனர். இது குறித்து கோவை கலெக்டருக்குத் தகவல் அளிக்கப்பட்டது. தகவலின் அடிப்படையில் கலெக்டர் ராசாமணி 5000 ரூபாய் வழங்கியுள்ளார். மேலும் இவர்கள் தற்காலிகமாகத் தங்குவதற்கு ஈர நெஞ்சம் அறக்கட்டளையினர் இடம் கொடுத்து உதவியுள்ளனர்.

இதனைத் தொடர்ந்து செய்தியாளர்களிடம் பேசிய ரமேஷ், “நிலச்சரிவு ஏற்பட்டபோது, டிசம்பர் மாதத்திற்குள் வீடு கட்டி தருவதாக அரசு கூறியுள்ளதால் காத்திருக்கிறோம். நிலச்சரிவு நிவாரணங்கள் வழங்கப்படும் என்று கூறிய போது நாங்கள் அங்கு இல்லாத காரணத்தினால் நிவாரணம் இன்னும் வந்தடையவில்லை. எனவே அரசு தங்களுக்கு இருக்க இருப்பிடம், ஏதேனும் ஒரு வேலையை ஏற்பாடு செய்து கொடுத்தால் உதவியாக இருக்கும்” எனக் கோரிக்கை விடுத்துள்ளனர் ரமேஷ் -கயல்விழி தம்பதியினர்.

Leave a Reply

Your email address will not be published. Required fields are marked *