செய்திகள்

3 ஆண்டுகளில் 60 ஆயிரத்து 567 பேருக்கு அரசு வேலை: தமிழக அரசு தகவல்

சென்னை, பிப்.19-–

தமிழகத்தில் கடந்த 3 ஆண்டுகளில் 60 ஆயிரத்து 567 பேர் அரசு பணியில் நியமிக்கப்பட்டு உள்ளதாக தமிழக அரசு விளக்கம் அளித்துள்ளது.

சென்னையில் 16.2.2024 அன்று நடைபெற்ற அரசு நிகழ்ச்சி ஒன்றில், தமிழ்நாட்டில் தி.மு.க. அரசு பொறுப்பேற்றதில் இருந்து கடந்த மாதம் வரை 60 ஆயிரத்து 567 பேருக்கு வேலைவாய்ப்பு வழங்கப்பட்ட விவரத்தை முதலமைச்சர் மு.க.ஸ்டாலின் குறிப்பிட்டார்.

இதுகுறித்து சில ஊடகங்களில் தெரிவிக்கப்பட்டுள்ள கருத்துக்களுக்கு தமிழக அரசு விளக்கம் அளித்துள்ளது.

அந்த விளக்கம் வருமாறு:-

தமிழ்நாட்டில் அரசுப் பணிக்கான பணியாளர்களை தேர்வு செய்வதற்காக உள்ள தேர்வு முகமைகளான தமிழ்நாடு அரசுப் பணியாளர் தேர்வாணையம், ஆசிரியர் தேர்வு வாரியம், மருத்துவ பணியாளர் தேர்வு வாரியம், சீருடை பணியாளர் தேர்வு வாரியம் ஆகியவற்றின் மூலம், கடந்த 2½ ஆண்டுகளில் வெவ்வேறு அரசுத் துறைகளில் உள்ள காலிப்பணியிடங்களுக்காக கடந்த ஜனவரி மாதம் வரை 27 ஆயிரத்து 858 அரசுப் பணியாளர்கள் தேர்வு செய்யப்பட்டு உள்ளனர்.

இதுதவிர பல்வேறு அரசு துறைகள் மற்றும் உள்ளாட்சி அமைப்புகள் மூலமாக ஜனவரி மாதம் வரை 32 ஆயிரத்து 709 பேர் பணி நியமனம் செய்யப்பட்டு உள்ளனர். துறைவாரியான நியமனங்களை பொறுத்தவரை நீதித்துறையில் 5,981 பணியிடங்களும், பள்ளிக் கல்வித்துறையில் 1,847 பணி யிடங்களும், வருவாய்த் துறையில் 2,996 பணியிடங்களும், சுகாதாரம் மற்றும் மக்கள் நல வாழ்வுத் துறையில் 4,286 பணியிடங்களும், ஊரக வளர்ச்சித் துறையில் 857 பணியிடங்களும்,

உயர் கல்வித் துறையில் 1,300 பணியிடங்களும், காவல்துறை, நகராட்சி நிர்வாகம், வேளாண்மை, சமூக நலம் மற்றும் சத்துணவு போன்ற அரசின் பிற துறைகளின் வாயிலாக 15,442 பணியிடங்களும் அந்தந்த துறைகளின் வழக்கமான நடைமுறைகளை பின்பற்றி நேரடியாக நிரப்பப்பட்டன.

இந்தவகையில் 32 ஆயிரத்து 709 இளைஞர்களுக்கு பணி நியமனங்கள் வழங்கப்பட்டுள்ளன.

தி.மு..க அரசு பொறுப்பேற்ற இந்த 3 ஆண்டு காலத்திற்குள் 60 ஆயிரத்து 567 பேருக்கு அரசுப் பணி நியமனம் வழங்கப்பட்டுள்ளது.

இது மட்டுமன்றி, தமிழ்நாட்டில் படித்த இளைஞர்களுக்கு பல்லா யிரக்கணக்கில் வேலைவாய்ப்பினை உருவாக்கிட உலக முதலீட்டாளர் மாநாடும் நடத்தப்பட்டது.

இம்மாநாட்டில் மேற்கொள்ளப்பட்ட புரிந்துணர்வு ஒப்பந்தங்கள் வாயிலாக நம் மாநிலத்தின் இளைஞர்களுக்கு இந்திய மற்றும் பன்னாட்டு நிறுவனங்களில் வேலை வாய்ப்புகளை உருவாக்கிட தமிழ் நாடு அரசு வழிவகை செய்துள்ளது.

இவ்வாறு அதில் கூறப்பட்டுள்ளது.

Loading

Leave a Reply

Your email address will not be published. Required fields are marked *