செய்திகள்

17-வது மக்களவையின் சபாநாயகர் ஆகிறார் ஓம் பிர்லா

டெல்லி, ஜூன் 17–

ராஜஸ்தான் மாநிலத்தைச் சேர்ந்த ஓம் பிர்லா 17-வது மக்களவையின் சபாநாயகராக தேர்வு செய்யப்பட்டுள்ளார்.

மக்களவை தேர்தலில் பாஜக பிரமாண்ட வெற்றி பெற்று ஆட்சி அமைத்துள்ளதை அடுத்து, 17-வது மக்களவையின் முதல் கூட்டத்தொடர் தொடங்கியது. நேற்றும் இன்றும் மக்களவைக்கு புதிதாக தேர்ந்தெடுக்கப்பட்டவர்கள் எம்பிக்களாக பதவிப் பிரமாணம் எடுத்துக் கொள்வார்கள்.

அவர்களுக்கு தற்காலிக சபாநாயகராக நியமிக்கப்பட்டுள்ள வீரேந்திர குமார் பதவிப் பிரமாணம் செய்து வைத்தார். இதைத்தொடர்ந்து வரும் 19-ம் தேதி (நாளை) மக்களவை சபாநாயகர் பதவிக்கான தேர்தல் நடைபெறும். மக்களவையில் பாஜகவுக்கு பெரும்பான்மை உறுப்பினர்கள் உள்ளதால், அக்கட்சியைச் சேர்ந்த ஒருவரே சபாநாயகராக தேர்ந்தெடுக்கப்படுவார்.

17 வது சபாநாயகர்

இந்நிலையில் தற்போது ஓம் பிர்லா 17-வது மக்களவையின் சபாநாயகராக தேர்வு செய்யப்பட்டுள்ளார். இவர் ராஜஸ்தான் மாநிலத்தைச் சேர்ந்தவர். இரு முறை எம்.பி ஆக பதவி வகித்துள்ளார். ராஜஸ்தானின் கொட்டா மக்களவைத் தொகுதியில் காங்கிரஸ் வேட்பாளர் ராம் நாராயண் மீனாவை 2.5 லட்சம் வாக்குகள் வித்தியாசத்தில் வென்று சாதனை படைத்துள்ளார் ஓம் பிர்லா.

இவர் 16-வது மக்களவை சபாநாயகர் சுமித்ரா மஹாஜன்-ஐ அடுத்து 17 வது மக்களவை சபாநாயகராகத் தேர்வு செய்யப்பட்டு உள்ளார். இம்முறை சுமித்ரா மஹாஜன் மக்களவைத் தேர்தலில் போட்டியிடவில்லை என்பது குறிப்பிடத்தக்கது.

மக்களவையின் துணை சபாநாயகர் பதவியை கடந்த முறை 3-வது பெரிய கட்சியாக இருந்த அதிமுகவுக்கு வழங்கிய பாஜக, இந்த முறை, ஆந்திர சட்டப் பேரவை தேர்தலில் பிரமாண்ட வெற்றி பெற்று ஆட்சி அமைத்துள்ள ஜெகன் மோகனின் ஒய்எஸ்ஆர் காங்கிரஸ் கட்சிக்கு வழங்கப்படலாம் என்றும் தகவல்கள் வெளியாகியுள்ளன.

அனைத்துக்கட்சி கூட்டம்

சபாநாயகர் தேர்வுக்குப் பிறகு, 20-ம் தேதி நாடாளுமன்ற இரு அவைகளின் கூட்டுக்கூட்டம் நடைபெறுகிறது. இந்த கூட்டத்தில் குடியரசுத்தலைவர் ராம்நாத் கோவிந்த் உரையாற்றுகிறார்.

இதைத்தொடர்ந்து குடியரசுத்தலைவர் உரைக்கு நன்றி தெரிவிக்கும் தீர்மானத்தின் மீது விவாதம் நடைபெறும். ஜுலை 4-ம் தேதி பொருளாதார ஆய்வறிக்கையை நிதி அமைச்சர் நிர்மலா சீதாராமன் தாக்கல் செய்வார்.

இதையடுத்து ஜுலை 5-ம் தேதி நிதி நிலை அறிக்கையை அவர் தாக்கல் செய்வார். பின்னர் நிதி நிலை அறிக்கை மீதான விவாதம் நடைபெறும். இந்த மக்களவை கூட்டத்தொடர் ஜுலை மாதம் 26-ம் தேதியுடன் நிறைவடைகிறது.

இந்த கூட்டத்தொடரை சுமூகமாக நடத்தும் வகையில் நேற்று மத்திய அரசு அனைத்துக்கட்சி கூட்டத்தை நடத்தியது. இதில் பிரதமர் நரேந்திர மோடி, பாதுகாப்புத்துறை அமைச்சர் ராஜ்நாத்சிங், நாடாளுமன்ற விவகாரங்களுக்கான அமைச்சர் பிரஹலாத் ஜோஷி ஆகியோர் கலந்து கொண்டனர்.

Leave a Reply

Your email address will not be published. Required fields are marked *