8 வயது சகோதரன் ஹரியும் தங்கம் வென்றான்
சென்னை, செப். 6–
சென்னையில் மாநில அளவில் நடந்த ஜிம்னாஸ்டிக் போட்டிகளில் சென்னையைச் சேர்ந்த சகோதரர்கள் (அண்ணன் துவாரக், தம்பி ஹரி) தங்கம் வென்றனர்.
சென்னை மாவட்ட ஜிம்னாஸ்டிக் சங்கத்தின் சார்பில், 16ம் ஆண்டு மாநில அளவிலான தமிழ்நாடு ஜிம்னாஸ்டிக் – 2024 போட்டி, வேளச்சேரியில் நீச்சல் குள வளாகத்தில் கடந்த 31ஆம் தொடங்கி 1ம் தேதி வரை 2 நாட்கள் நடந்தது. பல்வேறு மாவட்டங்களில் இருந்து 6 வயது முதல் 17 வயது நிறைந்த பள்ளி மாணவர்கள் 600க்கும் மேற்பட்டவர்கள் பங்கேற்றனர். 12, 14, 17 வயதுக்குட்பட்ட 3 பிரிவுகளில் நடந்தன. 2 நாட்கள் நடந்த போட்டிகளின் முடிவில், தமிழ்நாடு விளையாட்டு மேம்பாட்டு ஆணையத்தின், சென்னை எஸ்.டி.ஏ.டி., அணி மொத்தம், 20 தங்கம், 10 வெள்ளி, 7 வெண்கலப் பதக்கங்களை கைப்பற்றி ஒட்டுமொத்த சாம்பியன் பட்டத்தை வென்றது.
தர்மபுரி மாவட்ட அணி, 10 தங்கம், 7 வெள்ளி, 3 வெண்கலம் வென்று, 2வது இடமும், தஞ்சாவூர் அணி 5 தங்கம், 10 வெள்ளி, 2 வெண்கலம் வென்று, 3வது இடத்தையும் பிடித்தன.
இந்த ஜிம்னாஸ்டிக் போட்டியில் சென்னை அரும்பாக்கத்தைச் சேர்ந்த 10 வயது சிறுவன் கே. துவாரக் லெவல் 4–ல் தங்கப் பதக்கம் வென்றான். 8 வயது சிறுவன் கே. ஹரி 2வது லெவல் ஜிம்னாஸ்டிக் போட்டியில் தங்கம் வென்றான். துவாரக் இதற்கு முன்பு 3 முறையும், ஹரி 2 முறையும் ஜிம்னாஸ்டிக் போட்டிகளில் தங்கம் வென்றுள்ளனர்.
6 முறை இருதய ஆபரேஷன்:
10 வயது துவாரக்கிற்கு 6 முறை இருதய ஆபரேஷன் நடந்துள்ளது. இருந்தும் அது பற்றி எந்தவித அச்சமோ, பதட்டமோ இல்லாமல் போட்டியில் பங்கேற்று தங்கம் வென்று சாதனை படத்துள்ளான் என்பது குறிப்பிடத்தக்கது.
