செய்திகள்

மயிலாப்பூர் கபாலீஸ்வரர் கோவில் பங்குனி திருவிழா: கொடியேற்றத்துடன் துவங்கியது

* 25–ந்தேதி தேரோட்டம்

* 28–ந்தேதி திருக்கல்யாண உற்சவம்

* 26–ந்தேதி அறுபத்து மூன்று நாயன்மார்கள் திருவீதி உலா

போக்குவரத்து மாற்றம்

சென்னை, மார்ச்.19-

மயிலாப்பூர் கபாலீஸ்வரர் கோவிலில் இன்று காலை பங்குனி திருவிழா கொடியேற்றத்துடன் துவங்கியது. தொடர்ந்து வருகிற 25-ந் தேதி தேரோட்டமும், 26-ந் தேதி அறுபத்து மூன்று நாயன்மார்கள் திருவீதி உலா நடைபெற உள்ளது.

எல்லா உலகங்களுக்கும் நாயகனாய், விறகில் தீயும், பாலில் படு நெய்யும் போல் எங்கும் நிறைந்த சிவபெருமான் தம்மை மெய்யன்பர்கள் வழிபடும் பொருட்டு, பல்வகை திருவுருவம் தாங்கித் திருக்கோயில் கொண்டு எழுந்தருளிய தலங்களுள் ஒன்று, தொண்டை நாட்டில் சென்னை பகுதியில் கடலைச் சார்ந்தும், உமாதேவியார் மயில் வடிவம் கொண்டு இறைவனை வழிபட்டதும் முருகவேள், நான்முகன் வேதம் (மறை) சுக்கிரன் (வெள்ளி) இராமர் ஆகிய இவர்கள் வழிபட்டு பேறு பெற்றதும், திருஞான சம்பந்தர் என்னைப் பெண்ணுருவாக்கி அருளியதும், வாயிலார் நாயனார் தோன்றி வழிபட்டு முக்தி பெற்றதும், திருவள்ளுவர் அவதரித்த சிறந்த புண்ணியத்தலமுமான திருமயிலை கபாலீஸ்வரத்தில் எழுந்தருளியுள்ள கற்பகாம்பாள் உடனாய கபாலீஸ்வரப் பெருமானுக்கு ஆண்டுதோறும் பங்குனித் திருவிழா வெகு விமர்சையாக நடைபெற்று வருகிறது. அதே போல் இந்த ஆண்டும் பங்குனித் திருவிழா இன்று காலை 7 மணிக்கு வெகு விமர்சையாக மேள தாளங்கள் முழங்க துவங்கியது.

விழா நாட்களில் பல்வேறு வாகனங்களில் பகல், இரவு நேரங்களில் சாமி வீதி உலா நிகழ்ச்சிகள் நடைபெறுகிறது. 21–ந் தேதி காலை 6 மணிக்கு அதிகார நந்தி காட்சியும் நடைபெறுகிறது.

முக்கிய திருவிழாவான தேர்திருவிழா வருகிற 25-ந்தேதி (வியாழக்கிழமை) அன்று காலை 8 மணி அளவில் சுவாமி, அம்பாள் திருத்தேரில் எழுந்தருள்கின்றனர். 8.45 மணிக்கு திருத்தேர் வடம் பிடிக்கப்பட்டு தேரோட்டம் நடைபெறுகிறது.

திருக்கல்யாணம்

விழாவையொட்டி 26-ந்தேதி காலை திருஞானசம்பந்த சாமிகள் எழுந்தருளலும், பூம்பாவை உயிர்பெற்று எழுகின்ற நிகழ்ச்சி நடக்கிறது. மாலை 2.45 மணிக்கு வெள்ளி விமானத்தில் இறைவன் அறுபத்து மூன்று நாயன்மார்களோடு திருவீதி உலாவும் நடக்கிறது.

தொடர்ந்து 28-ந்தேதி (ஞாயிற்றுக்கிழமை) இரவு 7.30 மணிக்கு திருக்கல்யாணத்துடன் விழா நிறைவு பெறுகிறது. விழாவில் 10 நாட்களிலும் பகல், இரவு காலங்களிலும் ஐந்திருமேனிகள் திருவீதி உலா மற்றும் நாதஸ்வர நிகழ்ச்சிகள் மற்றும் இரவு 6.30 மணிக்கு விடையாற்றி சொற்பொழிவுகளும் நடக்கிறது.

விழா ஏற்பாடுகளை தக்கார் பி.விஜயகுமார் ரெட்டி, இணை-ஆணையர் த.காவேரி மற்றும் திருக்கோவில் பணியாளர்கள் உள்ளிட்ட பலர் செய்து வருகின்றனர்.

போக்குவரத்து மாற்றம்

இதுதொடர்பாக போக்குவரத்து போலீசார் நேற்று வெளியிட்ட செய்திக்குறிப்பில் கூறியிருப்பதாவது:-

சென்னை மயிலாப்பூர் கபாலீஸ்வரர் கோவில் பங்குனி திருவிழா இன்று முதல் வருகிற 28-ந்தேதி வரை நடைபெறுகிறது. இதையொட்டி தேவைப்படும் நேரங்களில் அந்த பகுதியில் போக்குவரத்து மாற்றம் செய்யப்படும். கோவிலை சுற்றி உள்ள பகுதிகளில் இருந்து, கோவிலை நோக்கி வாகனங்கள் செல்ல அனுமதிக்கப்படமாட்டாது.

ராயப்பேட்டை நெடுஞ்சாலை, கச்சேரி சாலையில் இருந்து அடையாறு செல்லும் வாகனங்கள் லஸ் சர்ச் சாலை, டிசில்வா சாலை, பக்தவச்சலம் சாலை, டாக்டர் ரங்கா சாலை, ஆர்.கே.மடம் சாலை வழியாக மந்தைவெளி சென்று போகலாம். அடையாறு பகுதியில் இருந்து ராயப்பேட்டை நெடுஞ்சாலை செல்லும் வாகனங்கள் மந்தைவெளி, ஆர்.கே.மடம் சாலை, சிருங்கேரி மடம் சாலை, லஸ்சர்ச் சாலை, விவேகானந்தா கல்லூரி வழியாக போக வேண்டும்.

கோவில் குளம் அருகில் உள்ள பஸ் நிறுத்தம், லஸ் சர்ச் சாலையில் உள்ள அமிர்தாஞ்சன் கம்பெனி அருகில் மாற்றப்படும்.

வருகிற 25-ந்தேதி மற்றும் 26-ந்தேதிகளில் சன்னதி தெரு, கிழக்கு மாட வீதி ஆகிய பகுதிகளில் எந்த வாகனமும் நிறுத்த அனுமதி இல்லை.

லஸ் சர்ச் சாலை, காமதேனு திருமண மண்டபம், வெங்கடேச அக்ரகாரம், பறக்கும் ரெயில் மேம்பாலம் கீழ் பகுதி ஆகிய இடங்களில் வாகனங்களை நிறுத்தலாம். பி.எஸ்.சிவசாமி பள்ளி, ஆர்.ஆர்.சபா அருகேயும், போலீசாரின் வாகனங்களை நிறுத்திக்கொள்ளலாம்.

இவ்வாறு செய்திக்குறிப்பில் தெரிவிக்கப்பட்டுள்ளது.

Leave a Reply

Your email address will not be published. Required fields are marked *