சென்னையில் பரபரப்பு
சென்னை, ஆக. 13–
சென்னையில் பிரபல ரவுடி ரோகித் ராஜை போலீசார் துப்பாக்கியால் சுட்டு பிடித்தனர். இதில் காயமடைந்த ரவுடி மருத்துவமனையில் அனுமதிக்கப்பட்டு சிகிச்சை பெற்று வருகிறார்.
சென்னையில் பிரபல ரவுடியாக வலம் வந்தவர் ரோஹித் ராஜன் . ரோஹித் ராஜன் மீது மைலாப்பூர், சேத்துப்பட்டு, பல்வேறு காவல் நிலையங்களில் 20க்கும் மேற்பட்ட கொலை, கொலை முயற்சி உள்ளிட்ட பல்வேறு வழக்குகள் நிலுவையில் உள்ளன. கடந்த 2021 ஆம் ஆண்டு கொடூரமாக கொலை செய்யப்பட்ட மயிலாப்பூரை சேர்ந்த ரவுடி சிவகுமார் கொலை வழக்கில் முக்கிய குற்றவாளியாக காவல்துறையினர் ரோஹித் ராஜன் மீது வழக்கு பதிவு செய்துள்ளனர்.
இந்தநிலையில் பல்வேறு வழக்குகளில் சம்பந்தப்பட்ட ரோஹித் ராஜன் தென் மாவட்டத்தில் பதுங்கி இருப்பதாக காவல்துறையினருக்கு தகவல் கிடைத்தது. இதனை அடுத்து கடந்த சில நாட்களாக தென் மாவட்டத்தில், போலீசார் தீவிர தேர்தல் வேட்டையில் ஈடுபட்ட பொழுது, ரோஹித் ராஜனை தேனியில் வைத்து கைது செய்து போலீசார் சென்னை அழைத்து வந்தனர். இந்த நிலையில் இன்று அவரை கொலை நடந்த இடத்தில் ஆய்வு செய்வதற்காக டி.பி. சத்திரம் பகுதிக்கு அழைத்து சென்றனர்.
அப்போது ரவுடி ரோகித் ராஜ், 2 காவலர்களை தாக்கிவிட்டு அங்கிருந்து தப்பி ஓட முயன்றார். இதைத் தொடர்ந்து சப்–இன்ஸ்பெக்டர் கலைச்செல்வி, தற்காப்பிற்காக ரோகித் ராஜ் மீது துப்பாக்கிச்சூடு நடத்தினர். இதில் அவரது காலில் துப்பாக்கி குண்டு பாய்ந்தது. இதையடுத்து போலீசார் சிகிச்சைக்காக அவரை ஆஸ்பத்திரிக்கு அனுப்பி வைத்தனர். சென்னை கீழ்ப்பாகம் அரசு மருத்துவமனையில் ரவுடி ரோகித் ராஜுக்கு சிகிசை அளிக்கப்பட்டு வருகிறது.
அதிகாலை நேரத்தில் போலீசார் துப்பாக்கி தூடு நடத்திய சம்பவம் டிபி சத்திரம் பகுதியில் பரபரப்பை ஏற்படுத்தி இருக்கிறது.
கமிஷனர் பாராட்டு
ரவுடி ரோகித் ராஜை சுட்டுப்பிடித்த பெண் சப்–இன்ஸ்பெக்டர் கலைச் செல்வியை, சென்னை மாநகர காவல்துறை கமிஷனர் அருண் நேரில் அழைத்து பாராட்டினார்.
