ஸ்டாலின் இரங்கல்
புதுச்சேரி, டிச.9-
புதுச்சேரி முன்னாள் முதலமைச்சர் எம்.டி.ஆர். ராமச்சந்திரன் மரணமடைந்தார். அவரது மறைவுக்கு தமிழக முதலமைச்சர் மு.க.ஸ்டாலின் இரங்கல் தெரிவித்துள்ளார்.
புதுச்சேரி முன்னாள் முதலமைச்சர் எம்.டி.ஆர். ராமச்சந்திரன் (வயது 91). உடல்நலக்குறைவு காரணமாக கடந்த சில நாட்களுக்கு முன்பு சென்னையில் உள்ள காவிரி மருத்துவமனையில் அனுமதிக்கப்பட்டார். இந்த நிலையில் நேற்று மாலை அவர் மரணம் அடைந்தார்.
மடுகரையில் உள்ள அவரது இல்லத்தில் பொதுமக்கள் அஞ்சலிக்காக வைக்கப்பட்டிருந்த உடலுக்கு ஏராளமானபேர் அஞ்சலி செலுத்தினார்கள்.
இறுதி ஊர்வலம் மாலை 4 மணிக்கு நடைபெறுகிறது.
இவர் கடந்த 1980–1983-ம் ஆண்டு வரை, 1990–1991-ம் ஆண்டு வரை 2 முறை முதலமைச்சராக இருந்துள்ளார். 2001–2006-ம் ஆண்டு வரை சபாநாயகராக பதவி வகித்துள்ளார். புதுவை சட்டசபையில் அமைச்சராகவும் இருந்துள்ளார். அவரது மறைவுக்கு கவர்னர் கைலாஷ்நாதன் மற்றும் அரசியல் கட்சி தலைவர்கள் இரங்கல் தெரிவித்துள்ளனர்.
தமிழக முதலமைச்சர் மு.க.ஸ்டாலின் வெளியிட்டுள்ள இரங்கல் செய்தியில் கூறியிருப்பதாவது:- புதுச்சேரியின் முன்னாள் முதலமைச்சரும், புதுவை மாநில தி.மு.க.வின் முன்னாள் அமைப்பாளருமாகிய ராமச்சந்திரன் மறைந்த செய்தியறிந்து மிகுந்த துயருற்றேன். அவரது மறைவிற்கு எனது ஆழ்ந்த இரங்கலைத் தெரிவித்துக்கொள்கிறேன்.
தி.மு.க. சார்பில் முதலமைச்சராக இருந்து, புதுச்சேரியின் வளர்ச்சிக்காக பல்வேறு நலத்திட்டங்களை செயல்படுத்தி சாதனை படைத்தவர். அவரது மறைவால் வாடும் அவரது குடும்பத்தினர் மற்றும் புதுச்சேரி மக்கள் அனைவருக்கும் எனது ஆறுதலை தெரிவித்துக்கொள்கிறேன்.
இவ்வாறு அவர் கூறியுள்ளார்.
