முதலமைச்சர் ஸ்டாலின் இரங்கல்
மேட்டுப்பாளையம், செப்.28-–
பத்மஸ்ரீ விருது பெற்ற 109 வயது பாப்பம்மாள் பாட்டி உடல் நலக்குறைவால் காலமானார்.
கோவை மாவட்டம் மேட்டுப்பாளையம் அருகே உள்ள தேக்கம்பட்டி கிராமத்தை சேர்ந்தவர் ரங்கம்மாள் (வயது 109). இவரை கிராம மக்கள் செல்லமாக ‘பாப்பம்மாள் பாட்டி’ என்று அழைத்து வந்தனர். இவரது கணவர் ராமசாமி, கடந்த 18 ஆண்டுகளுக்கு முன்பு இறந்துவிட்டார். இவர்களுக்கு குழந்தைகள் இல்லை. ஆரம்பத்தில் அந்த பகுதியில் டீக்கடை நடத்தி பிழைப்பு நடத்தி வந்தார்.
அதன்பிறகு விவசாயம் செய்ய ஆரம்பித்தார். அதுவும், இயற்கை விவசாயம் மேற்கொண்டார். தள்ளாத வயதிலும் இயற்கை விவசாயம் மீது கொண்ட ஆர்வத்தால் சிறந்து விளங்கிய பாப்பம்மாள் பாட்டியை கவுரவிக்கும் வகையில் கடந்த 2021–-ம் ஆண்டு மத்திய அரசு பத்மஸ்ரீ விருது வழங்கியது. அத்துடன் சமீபத்தில் தி.மு.க. பவள விழாவில் தந்தை பெரியார் விருது வழங்கப்பட்டது.
இந்த நிலையில் வயது முதிர்வு காரணமாக பாப்பம்மாள் பாட்டி கடந்த சில நாட்களாக உடல் நலக்குறைவால் அவதிப்பட்டு வந்தார். படுத்த படுக்கையாக இருந்து சிகிச்சை பெற்று வந்த அவர், நேற்றிரவு 8.30 மணியளவில் மரணம் அடைந்தார். அவரது மறைவால் அந்த கிராமமே சோகத்தில் ஆழ்ந்தது.
ஸ்டாலின் இரங்கல்
இதுகுறித்து முதலமைச்சர் மு.க.ஸ்டாலின் வெளியிட்டுள்ள சமூக வலைத்தளப் பதிவில் கூறியிருப்பதாவது:–
கழக முன்னோடியும் – கடந்த 17–ம் நாள் நடைபெற்ற முப்பெரும் விழாவில் பெரியார் விருது பெற்றவருமான பாப்பம்மாள் 108 அகவையில் மறைவெய்தினார் என்ற துயரச் செய்தியறிந்து கலங்கினேன்.
பேரறிஞர் அண்ணா மீதும் – கலைஞர் மீதும் பற்றுக் கொண்டு, கழகம் தொடங்கப்பட்ட நாள் முதல் தன்னை இயக்கத்துக்காக அர்ப்பணித்துக் கொண்டு பணியாற்றியவர்.
1965–ம் ஆண்டு நடைபெற்ற இந்தித் திணிப்பிற்கு எதிரான போராட்டம் தொடங்கி, தமிழ்நாட்டு மாணவர்களின் நலன் காக்க நீட் தேர்வுக்கு எதிரான போராட்டம் வரை அத்தனை போராட்டக்களங்களையும் நெஞ்சுரத்தோடு எதிர்கொண்டவர் அவர்.
1959–ம் ஆண்டு தேக்கம்பட்டி ஊராட்சி உறுப்பினராகத் தேர்ந்தெடுக்கப்பட்ட பாப்பம்மாள், 1964–ல் காரமடை ஊராட்சி ஒன்றியக்குழு உறுப்பினராகவும், பின்னர் தேக்கம்பட்டி ஊராட்சி மன்றத் துணைத் தலைவராகவும் பொறுப்பேற்று பணியாற்றினார்.
1970–ம் ஆண்டு தொடங்கி 45 ஆண்டுகாலம் தமிழ்நாடு வேளாண் பல்கலைக் கழக உழவர் விவாதக்குழு உறுப்பினராகச் செயல்பட்டார். 1965–ம் ஆண்டிலேயே மாதர் சங்கத் தலைவராகச் செயல்பட்டு, கிராமப் பெண்களின் முன்னேற்றத்துக்கான சமூகப் பணிகளை மேற்கொண்டார்.
தனது இறுதிமூச்சு வரையில், சுறுசுறுப்பாக வயலில் இறங்கி வேளாண் பணிகள் செய்து வந்தவர் பாப்பம்மாள்.
பாப்பம்மாளின் வாழ்வையும் தொண்டையும் போற்றும் வகையில் ஒன்றிய அரசு சார்பாக கடந்த 2021–ம் ஆண்டு பத்மஸ்ரீ விருது வழங்கப்பட்டது. அப்போது, “உற்சாகத்துடனும், கொள்கை உணர்வோடும் எப்பொழுதும் புன்னகை மாறாத பாப்பம்மாள் பாட்டி நமக்கெல்லாம் உந்துசக்தி!” என்று அவரை வாழ்த்தினேன்.
கழக முப்பெரும் விழாவில், “ஒட்டுமொத்தத் தமிழ்நாட்டின் அடையாளம்” என அவரை மனம் நெகிழப் பாராட்டி மகிழ்ந்திருந்தேன். ஆனால் இன்று சொல்லொணாத் துயரத்தில் நம்மையெல்லாம் ஆழ்த்தி விட்டு அவர் நம்மைவிட்டு பிரிந்துவிட்டார்.
அண்ணா அறிவாலயத்திலும், எனது இல்லத்திலும் பாப்பம்மாளைச் சந்தித்து உரையாடிய ஒவ்வொரு தருணமும் என் நெஞ்சில் எப்போதும் நீங்காமல் பசுமையாக இருக்கும்.
என் குடும்பத்தில் ஒருவரைப் பிரிந்த வலியுடன் தவிக்கிறேன். பாப்பம்மாளை இழந்து தவிக்கும் குடும்பத்தினர், உறவினர்கள், கழக உடன்பிறப்புகள் உள்ளிட்ட அனைவருக்கும் எனது ஆழ்ந்த இரங்கலையும் ஆறுதலையும் தெரிவித்துக் கொள்கிறேன்.
இவ்வாறு மு.க.ஸ்டாலின் கூறியுள்ளார்.
