செய்திகள்

தாவணி, சேலை அணிந்து கிராமியச் சூழலில் ‘பொங்கல் விழாவை’ கொண்டாடி மகிழ்ந்த எம்.ஜி.ஆர். ஜானகி கல்லூரி மாணவிகள்

சென்னை, ஜன. 12–

சென்னை ராஜா அண்ணாமலைபுரத்தில் உள்ள டாக்டர் எம்.ஜி.ஆர்.-ஜானகி மகளிர் கல்லூரி வளாகத்தில் நடைபெற்ற பொங்கல் விழாவில் மாணவிகள் பாரம்பரிய முறையில் மகிழ்ச்சியுடன் பொங்கல் பண்டிகையைக் கொண்டாடினர். இரண்டாயிரத்திற்கும் மேற்பட்ட மாணவிகள் வண்ணமயமான தாவணி, பட்டுப் புடவைகளை அணிந்து வந்தனர்.

இந்தக் கொண்டாட்டத்திற்காகவே சிறப்பாக உருவாக்கப்பட்டிருந்த கிராமப்புற சூழல், பார்ப்பவர்களின் கவனத்தை ஈர்ப்பதாக அமைந்தது.

பல்வேறு பொருள்களை விற்பதற்கென்று மாணவிகளே அமைத்து நிர்வகித்த அங்காடிகளில் வளையல்களும், பலூன்களும் மட்டுமின்றி கரும்புச் சாறு, மோர், இளநீர், பஞ்சு மிட்டாய் ஆகிய நாவிற்கு சுவையூட்டும் பல்வேறு பொருட்களும் விற்கப்பட்டன. மேலும் கிளி ஜோசியம் பார்த்தனர். கேழ்வரகு கூழ், பஜ்ஜி, சுண்டல் விற்பவர்களும் இருந்த காட்சி கிராமத்து சந்தையின் அழகை அப்படியே கண்முன்னே கொண்டுவந்து நிறுத்தியது.

மகிழ்ச்சி நிறைந்த இவ்விழாவில் மாணவிகள் நிகழ்த்திய கோலாட்டம், கும்மியாட்டம், கரகாட்டம், ஒயிலாட்டம் போன்ற நாட்டுப்புற நடனங்கள் பார்வையாளர்களை ஈர்த்தன. பெரிய பானையில் பொங்கல் பொங்கி வருவதைக் கண்ட மாணவியர் அனைவரும் சேர்ந்து ‘‘பொங்கலோ பொங்கல்’’ என்று விண்ணைப் பிளக்கும் வகையில் முழக்கம் எழுப்பினர். பொங்கல் விழா என்பது நல்ல விளைச்சலுக்காகவும், அறுவடைக்காகவும் இறைவனுக்கு நன்றி சொல்லும் விழா என்பதை நினைவூட்டுவதாக இக்காட்சி அமைந்திருந்தது குறிப்பிடத்தக்கது.

“தொழில்நுட்ப வளர்ச்சியின் காரணமாக வேகமாக மாறிவரும் இவ்வுலகில், நம்முடைய மதிப்பு மிகுந்த மரபையும், விழுமியங்களையும் நாம் மறக்காமல் இருப்பது முக்கியம். அந்த வகையில் நம்முடைய பண்பாட்டின் வளத்தினையும், பெருமையையும் நம்முடைய இளைய சமுதாயம் உணர்ந்து, அதனை அடுத்த தலைமுறைக்கு எடுத்துச் செல்வதற்கு இவ்வாறான விழாக்கள் பெரிதும் உதவும். இந்த நோக்கத்தை முன்னிறுத்தி நம்முடைய கலாச்சாரத்திற்குப் பெருமை சேர்க்கும் பல்வேறு விழாக்களை தொடர்ந்து நடத்தி வருவதில் எங்கள் கல்லூரி பெருமை கொள்கிறது” என்று டாக்டர் எம்.ஜி.ஆர்.-ஜானகி மகளிர் கல்லூரியின் செயலாளர் லதா ராஜேந்திரன் தெரிவித்தார்.

Leave a Reply

Your email address will not be published. Required fields are marked *