செய்திகள்

தனிநபர் வருமானத்தில் தமிழகம் குறிப்பிடத்தக்க முன்னேற்றம் அடைந்துள்ளது: தமிழக அரசு தகவல்

Makkal Kural Official

சென்னை, அக்.22-–

தனிநபர் வருமானத்தில் தமிழகம் குறிப்பிடத்தக்க முன்னேற்றத்தை அடைந்துள்ளது என தமிழ்நாடு அரசு தெரிவித்துள்ளது.

இதுகுறித்து தமிழ்நாடு அரசு வெளியிட்டுள்ள செய்திக்குறிப்பில் கூறியிருப்பதாவது:–-

இந்தியாவின் மொத்த உள்நாட்டு உற்பத்தியில் தமிழ்நாட்டின் மொத்த உள்நாட்டு உற்பத்தி விகிதம் அபரிமிதமாக உள்ளது. அதாவது, தமிழ்நாட்டின் மொத்த உள்நாட்டு உற்பத்தி 2022–-23-ம் ஆண்டு 8.88 சதவீதம் என இருந்த நிலையில் 2023-–24-ம் ஆண்டில் 9.21 சதவீதமாக உயர்ந்துள்ளது.

மொத்த உள்நாட்டு உற்பத்தியை பொறுத்தமட்டில் மராட்டிய மாநிலத்துக்கு அடுத்தபடியாக 2-வது இடத்தில் தமிழ்நாடு உள்ளது. தமிழ்நாட்டின் பணவீக்க விகிதம் 2022–-23-ம் நிதியாண்டில் 5.97 சதவீதமாக இருந்தது. இது, 2023-–24-ம் ஆண்டில் 5.37 சதவீதமாக உள்ளது. இதே காலகட்டத்தில் இந்தியாவின் பணவீக்க விகிதம் 6.65, 5.38 சதவீதம் என்ற அடிப்படையில் இருந்தன.

தமிழ்நாட்டின் சராசரி பொருளாதார வளர்ச்சி விகிதம் 2021–-22, 2022–-23-ம் ஆண்டுகளில் முறையே 7.89, 8.13 சதவீதம் என இருந்த நிலையில் 2023–-24-ம் ஆண்டில் 8.23 சதவீதமாக உள்ளது.

முந்தைய ஆண்டுகளுடன் ஒப்பிடும்போது மாநிலத்தின் ஒட்டுமொத்த பொருளாதார வளர்ச்சியில் தமிழ்நாடு குறிப்பிடத்தக்க முன்னேற்றம் அடைந்துள்ளது.

இந்தியாவின் தனிநபர் வருமானத்தை ஒப்பிடும் போது, தமிழ்நாட்டின் தனிநபர் வருமானமும் நல்ல முன்னேற்றத்தில் உள்ளது.

உற்பத்தித் துறையிலும் தமிழகம் வலுவான வளர்ச்சியை கண்டுள்ளது. 2022-–23, 2023-–24-ம் ஆண்டுகளில் மாநிலத்தின் மொத்த உள்நாட்டு உற்பத்தியில் பணித்துறையானது 45.47, 45.90 என்ற சதவீதத்தில் பங்களித்துள்ளது. தமிழ்நாட்டின் பொருளாதார வளர்ச்சிக்கு பணித்துறை குறிப்பிடத்தக்க பங்களிப்பை வழங்கி உள்ளது. போக்குவரத்து, சேமிப்புகிடங்கு, தகவல் தொடர்பு துறை, கட்டுமான துறைகள் நல்ல வளர்ச்சி கண்டுள்ளன. கட்டுமானத்துறை 10.08 சதவீதம் வளர்ச்சி கண்டுள்ளது.

இவ்வாறு அதில் கூறப்பட்டுள்ளது.

Loading

Leave a Reply

Your email address will not be published. Required fields are marked *