செய்திகள்

டி20 உலகக் கோப்பை கிரிக்கெட்: இந்திய அணிக்கு புதிய சீருடை அறிமுகம்

புதுடெல்லி, அக். 14–

டி20 உலகக் கோப்பை கிரிக்கெட் போட்டியில் பங்கேற்கும் இந்திய அணிக்கு புதிய சீருடை அறிமுகப்படுத்தப்பட்டுள்ளது.

அணியில் வேகப்பந்து வீச்சாளர் ஷர்துல் தாக்கூருக்கு வாய்ப்பு அளிக்கப்பட்டுள்ளது.

16 அணிகள் பங்கேற்கும் 7-வது 20 ஓவர் உலககோப்பை கிரிக்கெட் போட்டி வருகிற 17- ந்தேதி முதல் அடுத்த மாதம் 14-ந்தேதி வரை ஓமன் மற்றும் ஐக்கிய அரபு அமீரகத்தில் நடக்கிறது. இதில் சூப்பர்-12 சுற்றில் நேரடியாக பங்கேற்கும் இந்திய அணி ஏற்கனவே அறிவிக்கப்பட்டு விட்டது.

அக்டோபர் 18-ந்தேதி பயிற்சி ஆட்டத்தில் இங்கிலாந்தை எதிர்த்து விளையாடுகிறது. அதைத் தொடர்ந்து 20–ந் தேதி ஆஸ்திரேலியாவுடன் பயிற்சி ஆட்டத்தில் விளையாடும் இந்திய அணி 24–ந் தேதி நடைபெறும் முதல் ஆட்டத்தில் பாகிஸ்தான் அணியுடன் மோதுகிறது.ஐசிசி உலக கோப்பை டி20 போட்டித் தொடரில் களமிறங்க உள்ள இந்திய அணி வீரர்களுக்கான புதிய சீருடை நேற்று அறிமுகமானது. ‘பில்லியன் சியர்ஸ் ஜெர்சி’ என அழைக்கப்படும் இந்த சீருடை இந்திய ரசிகர்களின் உணர்வை வெளிப்படுத்தும் வகையில் வடிவமைக்கப்பட்டுள்ளது. புதிய ஜெர்சி குறித்து பிசிசிஐ தலைவர் சவுரவ் கங்குலி கூறுகையில், ‘இந்திய அணிக்கு உள்நாட்டில் மட்டுமல்ல, உலகம் முழுவதும் ரசிகர்கள் உள்ளனர். அவர்களின் உற்சாகத்தையும், ஆற்றலையும் வெளிப்படுத்த இதைவிட சிறந்த வழி இருக்க முடியாது’ என்றார். இந்த சீருடை வர்த்தக ரீதியாகவும் கடைகளில் ரூ.1,799க்கு விற்பனை செய்யப்பட உள்ளது.

இந்திய அணியில் ஆல்-ரவுண்டர் ஹர்திக் பாண்ட்யா பந்து வீசுவதற்கு இன்னும் தகுதியுடன் இல்லாத நிலையில் ஒரு வேகப்பந்து வீச்சாளர் பற்றாக்குறை இருப்பதாக முன்னாள் வீரர்கள் பலரும் குறை கூறினர்.

இந்த நிலையில் இதை கருத்தில் கொண்டு 20 ஓவர் உலக கோப்பை போட்டிக்கான 15 பேர் கொண்ட இந்திய அணியில் சுழற்பந்து வீச்சாளர் அக்‌ஷர் பட்டேல் நீக்கப்பட்டு அவருக்கு பதிலாக ஆல்-ரவுண்டரான வேகப்பந்து வீசக்கூடிய ஷர்துல் தாக்கூர் சேர்க்கப்பட்டு இருப்பதாக இந்திய கிரிக்கெட் வாரியம் நேற்று அறிவித்தது. ஸ்ரேயாஸ் அய்யர், தீபக் சாஹர் ஆகியோருடன் அக்‌ஷர் பட்டேலும் மாற்று வீரர்கள் பட்டியலில் வைக்கப்பட்டுள்ளார். ஒரு வேளை சுழற்பந்து வீச்சாளர் ரவீந்திர ஜடேஜா காயமடைந்தால், அக்‌ஷர் பட்டேல் மீண்டும் பிரதான அணிக்குள் நுழைவார்.

29 வயதான மராட்டியத்தை சேர்ந்த ஷர்துல் தாக்குர் 4 டெஸ்ட், 15 ஒரு நாள் மற்றும் 22 இருபது ஓவர் போட்டிகளில் விளையாடி இருக்கிறார். நடப்பு ஐ.பி.எல். தொடரில் சென்னை சூப்பர் கிங்ஸ் அணிக்காக 18 விக்கெட்டுகள் வீழ்த்தி கவனத்தை ஈர்த்துள்ளார்.

மேலும் இந்திய அணியை தயார்படுத்துவதற்கு உதவிடும் வகையில் வலை பயிற்சி பவுலர்களான உம்ரான் மாலிக், அவேஷ் கான், ஹர்ஷல் பட்டேல், லுக்மன் மெரிவாலா, வெங்கடேஷ் அய்யர், கரண் ஷர்மா, ஷபாஸ் அகமது, கிருஷ்ணப்பா கவுதம் ஆகியோரை அமீரகத்திலேயே இருக்கும்படி இந்திய கிரிக்கெட் வாரியம் உத்தரவிட்டுள்ளது.

Leave a Reply

Your email address will not be published. Required fields are marked *