புதுடெல்லி, ஆக. 14–
சுதந்திர தினத்தை முன்னிட்டு சிறப்பாக பணியாற்றிய தமிழகத்தைச் சேர்ந்த 23 காவல் அதிகாரிகளுக்கு ஜனாதிபதி விருது அறிவிக்கப்பட்டுள்ளது. இதில் டிஜிபி வன்னியபெருமாள், ஏடிஜிபி அபின் தினேஷ் மோடாக் ஆகிய இருவருக்கு சிறப்புமிக்க சேவைக்கான விருது அறிவிக்கப்பட்டுள்ளது.
நாட்டின் 78வது சுதந்திரதின விழா நாடு முழுவதும் நாளை கோலாகலமாக கொண்டாடப்பட உள்ளது.
இந்திய அளவில் தனிச்சிறப்புடன் பணியாற்றும் போலீஸ் அதிகாரிகளுக்கு ஆண்டுக்கு 2 முறை குடியரசு தினம் மற்றும் சுதந்திர தினத்தையொட்டி, ஜனாதிபதி விருதுகள் வழங்கப்படுகின்றன. போலீசாரின் செயல்பாடு, சாதனைகள் மற்றும் நன்மதிப்பு அடிப்படையில் 3 பிரிவுகளில் இந்த விருதுகள் அறிவிக்கப்படும்.
அந்த வகையில், நாடு முழுவதும் சிறப்பாக செயல்பட்ட காவல்துறை, தீயணைப்புத் துறை, மத்திய துணை ராணுவப் படை, ஊர்க்காவல் படையை சேர்ந்த 1,037 பேர் ஜனாதிபதி விருதுக்கு தேர்வு செய்யப்பட்டுள்ளனர்.
இந்த ஆண்டுக்கான விருதை மத்திய உள்துறை அமைச்சகம் வெளியிட்டுள்ளது. இதில் இந்த முறை வீர, தீர செயலுக்கான விருது பட்டியலில் தமிழகத்தைச் சேர்ந்த யாரும் இடம்பெறவில்லை. வீர, தீர செயலுக்கான விருதை தெலுங்கானாவை சேர்ந்த காவலர் ஒருவர் பெறுகிறார். எனினும், மற்ற இரண்டு பிரிவுகளில் தமிழகத்தை சேர்ந்த காவல் அதிகாரிகள் விருதுகள் பெறுகின்றனர்.
ஜனாதிபதியின் தகைசால் பணிக்கான விருதுகள் தமிழகத்தை சேர்ந்த டிஜிபி வன்னிய பெருமாள் மற்றும் ஏடிஜிபி அபின் தினேஷ் மோடாக் ஆகிய 2 காவல் அதிகாரிகளுக்கு வழங்கப்படவுள்ளது.
திறம்பட சேவையாற்றிய பிரிவில் தமிழகத்தைச் சேர்ந்த 21 காவல் அதிகாரிகளுக்கு சிறப்பு விருதுகள் அறிவிக்கப்பட்டுள்ளன.
அதன்படி, ஐஜி கண்ணன், ஐஜி பாபு, ஆணையர் பிரவீன்குமார், எஸ்பிக்கள் பெரோஸ்கான் அப்துல்லா, சுரேஷ்குமார், கிங்ஸ்லின், ஷியாம்ளா தேவி, பிரபாகர், பாலாஜி சரவணன் ஆகியோருக்கு விருதுகள் அறிவிக்கப்பட்டுள்ளது.
டி.எஸ்.பிக்கள் டில்லி பாபு, மனோகரன், சங்கு ஆகியோருக்கு விருதுகள் அறிவிக்கப்பட்டுள்ளது.
இதேபோல், ஏஎஸ்பிக்கள் ராதாகிருஷ்ணன், ஸ்டீபன் ஆகியோருக்கு விருதுகள் அறிவிக்கப்பட்டுள்ளது.
ஆய்வாளர்களில், தமிழகத்தைச் சேர்ந்த சந்திரசேகர், சந்திரமோகன், ஹரிபாபு, தமிழ்ச்செல்வி ஆகியோருக்கும் அறிவிக்கப்பட்டுள்ளது.
முரளி, ரவிச்சந்திரன், முரளிதரன் ஆகிய 3 எஸ்.ஐ.க்களுக்கும் ஜனாதிபதியின் சிறப்பு விருதுகள் அறிவிக்கப்பட்டுள்ளன.
இதேபோல தீயணைப்பு துறையில் சிறப்பாக பணியாற்றியவர்களுக்கும் 3 பிரிவில் விருதுகள் அறிவிக்கப்படும். ஆனால், இந்த ஆண்டும் இந்தப் பட்டியலில் தமிழகத்தைச் சேர்ந்த யாரும் இடம்பெறவில்லை குறிப்பிடத்தக்கது.
இதேபோல் மத்திய உள்துறைக்கான சிறப்பு விருது தமிழகத்தைச் சேர்ந்த 3 பேருக்கு அறிவிக்கப்பட்டுள்ளது. அதன்படி, கம்பெனி கமாண்டர் மூர்த்தி, பிளாட்டூர் கமாண்டர் கலையழகன், ஏரியா கமாண்டர் பிளாட்பினுக்கு உள்துறை விருதுகள் வழங்கப்படவுள்ளது.
