செய்திகள்

சீன நிறுவனம் கைப்பற்ற முயற்சி: 44 சொகுசு ரெயில் பெட்டிகளை தயாரிப்பதற்கான டெண்டர் ரத்து

டெல்லி, ஆக.22–-

44 சொகுசு ரயில் பெட்டிகள் தயாரிக்கும் பணிக்கு விடப்பட இருந்த டெண்டர் ரத்து செய்யப்பட்டது.

வந்தே பாரத் திட்டத்தின் கீழ் 44 அதிவேக ரயில் பெட்டிகளைத் தயாரிக்க இந்தியன் ரெயில்வே திட்டமிட்டது. இதற்காக சர்வதேச அளவில் டெண்டர் விடப்பட்டது. இந்திய, சர்வதேச நிறுவனங்கள் டெண்டரில் கலந்துகொண்டன. இதில் சிஆர்ஆர்சி எலெக்ட்ரானிக்ஸ் என்ற சர்வதேச நிறுவனம் டெண்டரைக் கைப்பற்ற முயற்சித்தது. இந்த நிறுவனம் சீனாவை தலைமையிடமாகக் கொண்டது என்பதை அறிந்த இந்தியன் ரெயில்வே, வந்தே பாரத் ரெயில் பெட்டிகளுக்கான டெண்டரை ரத்து செய்து உத்தரவிட்டது.

மேலும் திருத்தப்பட்ட பொது கொள்முதல் (இந்தியாவில் தயாரிக்க விருப்பம்) உத்தரவுப்படி, புதிய டெண்டர் ஒரு வாரத்திற்குள் விடப்படும் என ரெயில்வே அமைச்சகம் தனது அதிகாரபூர்வ ட்விட்டர் பக்கத்தில் தெரிவித்துள்ளது.

இந்தியா – சீனா இடையே கடந்த மே மாதம் முதல் எல்லைப்பிரச்சினை தீவிரமடைந்து வருகிறது. இதற்கிடையே கல்வான் பள்ளத்தாக்கில் ஜூன் 15–ம் தேதியன்று நடைபெற்ற மோதலில் 20 இந்திய வீரர்கள் உயிரிழந்தனர். இதையடுத்து எல்லைப்பிரச்சினையை விரைந்து தீர்க்க இருதரப்பு அதிகாரிகளும் தொடர்ந்து பேச்சுவார்த்தை நடத்தி வருகின்றனர்.

இந்நிலையில் இந்தியாவில் சீன ஆப்களுக்கு தடை விதிக்கப்பட்டுள்ளது. சீன முதலீடு, சீன ஸ்பான்சர்களையும் இந்தியா தவிர்த்து வருகிறது. ஐபிஎல் நிறுவனத்தின் டைட்டில் ஸ்பான்சராக இருந்த சீனாவைச் சேர்ந்த விவோ நிறுவனம் நீக்கப்பட்டு அந்த ஸ்பான்சர் தற்போது ட்ரீம் 11 என்ற இந்திய நிறுவனத்துக்கு வழங்கப்பட்டது குறிப்பிடத்தக்கது.

Leave a Reply

Your email address will not be published. Required fields are marked *