செய்திகள்

சிதம்பரம் நடராஜர் கோயிலில் 2–வது நாளாக அதிகாரிகள் ஆய்வு

அலுவலக சாவி இல்லை என்று தீட்சிதர்கள் கூறியதால் அதிர்ச்சி

சிதம்பரம், ஜூன் 8–

சிதம்பரம் நடராஜர் கோயில் செயலாளர் அலுவலக சாவி இல்லை என்று தீட்சிதர்கள் கூறியதால், கோயிலில் இரண்டாவது நாளாக இன்று ஆய்வு நடத்தச் சென்ற அறநிலையத் துறை அதிகாரிகள் ஆலோசனை நடத்தி வருகிறார்கள்.

சிதம்பரம் நடராஜர் கோயிலில், அடுத்தக்கட்ட நடவடிக்கை குறித்து அறநிலையத்துறை அதிகாரிகள் ஆலோசனை நடத்தி வரும் நிலையில், அறநிலையத் துறை அதிகாரிகள் சென்ற நேரத்தில் செயலாளர் மற்றும் நிர்வாகிகள் இல்லாததால் பேச்சுவார்த்தை நடத்தக் கூட கோயிலில் யாரும் இல்லை என்று கூறப்படுகிறது.

கோயிலின் வரவு – செலவு கணக்குகளை ஆய்வு செய்யச் சென்ற அறநிலையத் துறை அதிகாரிகளிடம், கோயிலின் செயலாளர் அலுவலக சாவி இல்லை என்று தீட்சிதர்கள் கூறியிருப்பது அதிகாரிகளுக்கு கடும் அதிர்ச்சியை ஏற்படுத்தியுள்ளது.

கடலூர் மாவட்டம், சிதம்பரம் நடராஜர் கோயிலில் இந்து சமய அறநிலையத் துறை குழுவினர் நேற்று ஆய்வு செய்ய முயன்றனர். ஆனால், கோயில் பொது தீட்சிதர்கள் ஆட்சேபம் தெரிவித்ததால் அதிகாரிகள் திரும்பிச் சென்றனர்.

சிதம்பரம் நடராஜர் கோயில் தொடர்பான புகார்களின் அடிப்படையில், வரவு- செலவுக் கணக்கு, கோயில் சொத்து விவரம் உள்ளிட்டவை குறித்து ஆய்வு செய்ய இந்து சமய அறநிலையத் துறை சார்பில் குழு அமைக்கப்பட்டது. இந்தக் குழுவினர் ஜூன் 7, 8–ம் தேதிகளில் கோயிலில் ஆய்வு செய்வர் என்று கோயில் நிர்வாகத்துக்கு நோட்டீஸ் அளிக்கப்பட்டது.

இதன்படி, இந்து சமய அறநிலையத் துறை குழுவின் ஒருங்கிணைப்பாளரும் துணை ஆணையருமான ஜோதி, ஆலய நிலங்களுக்கான மாவட்ட வருவாய் அலுவலர் சுகுமார், பழனி முருகன் கோயில் இணை ஆணையர் நடராஜன், வேலூர் மாவட்ட இணை ஆணையர் லட்சுமணன், பெரம்பலூர் உதவி ஆணையர் அரவிந்தன், திருநெல்வேலி மண்டல தணிக்கை அலுவலர் ராஜேந்திரன், சிதம்பரம் கோட்டாட்சியார் கே.ரவி உள்ளிட்டோர் அடங்கிய குழுவினர் நேற்று சிதம்பரம் நடராஜர் கோயிலுக்கு வந்தனர். அவர்களை பொது தீட்சிதர்கள் வரவேற்று, கோயிலுக்குள் அழைத்துச் சென்றனர். தொடர்ந்து, ஆய்வுக் குழுவினர் கனகசபை மீது ஏறி சுவாமி தரிசனம் செய்தனர். தில்லை கோவிந்தராஜ பெருமாள் கோயிலிலும் தரிசனம் செய்தனர்.

பின்னர், ஆய்வுக்குத் தேவையான ஆவணங்களை கோயில் பொது தீட்சிதர்களிடம் அதிகாரிகள் கோரினர். ஆனால், பொது தீட்சிதர்கள் தரப்பில் ஆய்வுக்கு ஆட்சேபம் தெரிவிக்கப்பட்டது. அவர்கள் சார்பில் வழக்குரைஞர் சந்திரசேகர் அதிகாரிகளிடம் ஆட்சேபக் கடிதம் வழங்கினார்.

இதையடுத்து, இந்து சமய அறநிலையத் துறை குழுவினர் திரும்பிச் சென்றனர். மாலை 4 மணியளவில் அதிகாரிகள் குழுவினர் நடராஜர் கோயிலுக்கு மீண்டும் வந்து ஆய்வுக்கு உள்படுமாறு பொது தீட்சிதர்களிடம் வலியுறுத்தினர். அதற்கு தீட்சிதர்கள் தரப்பில் மீண்டும் ஆட்சேபம் தெரிவிக்கப்பட்டதால், அதிகாரிகள் திரும்பிச் சென்றனர்.

இந்த நிலையில்தான், இன்று (புதன்கிழமை) மீண்டும் அறநிலையத் துறை அதிகாரிகள் ஆய்வுக்கு வந்தனர். அவர்களிடம், அலுவலக சாவி இல்லை என்று தீட்சிதர்கள் கூறியிருக்கும் நிலையில் அடுத்து என்ன செய்வது என்று தெரியாமல் அதிகாரிகள் ஆலோசனை நடத்தி வருகிறார்கள்.

Leave a Reply

Your email address will not be published.