ராஞ்சி, ஜூலை 4–
ஜாமீனில் விடுதலையாகியுள்ள ஹேமந்த் சோரன் மீண்டும் ஜார்கண்ட் முதலமைச்சராக பதவியேற்க உள்ளதாக தகவல் வெளியாகியுள்ளது.
நாடாளுமன்ற தேர்தல் அறிவிக்கப்பட இருந்த நிலையில், இந்தியா கூட்டணியில் இருந்த, ஜார்கண்ட் மாநில முதலமைச்சர் ஹேமந்த் சோரன் அமலாக்கத்துறையால் கடந்த ஜனவரி 31ஆம் தேதி கைது செய்யப்பட்டார். முதலமைச்சர் பதவியில் இருந்த போதே கைது செய்யப்பட்டது நாடு முழுவதும் பெரிய அதிர்ச்சியை ஏற்படுத்தியது.
ஹேமந்த் சோரன் கைதான பின்னர் தனது முதலமைச்சர் பதவியை ராஜினாமா செய்தார். அவரது கட்சியைச் சேர்ந்த சம்பாய் சோரன் முதலமைச்சராக தேர்ந்தெடுக்கப்பட்டார். இதற்கிடையே மதுபான கொள்கை வழக்கில் டெல்லி முதலமைச்சர் அரவிந்த் கெஜ்ரிவால் கைது செய்யப்பட்டார்.
முதலமைச்சர்களின் கைதை கண்டித்து, இந்தியா கூட்டணிக் கட்சிகளின் சார்பில் டெல்லியில் நடைபெற்ற பிரம்மாண்ட பேரணியில் ஏராளமானோர் கலந்து கொண்டு பாஜக அரசுக்கு எதிரான கோஷங்களை முன்வைத்தனர்.
மீண்டும் ஹேமந்த் சோரன்
இந்த சூழலில் அரவிந்த் கெஜ்ரிவால் தரப்பிலும், ஹேமந்த் சோரன் தரப்பிலும் ஜாமீன் கேட்டு விண்ணப்பித்த போதும் அமலாக்கத்துறை அதற்கு எதிர்ப்பு தெரிவித்தது. மக்களவைத் தேர்தல் பிரச்சாரத்தில் பங்கேற்க அரவிந்த் கெஜ்ரிவாலுக்கு உச்ச நீதிமன்றம் இடைக்கால ஜாமீன் வழங்கியது. ஆனாலும் ஹேமந்த் சோரனுக்கு இடைக்கால ஜாமீன் கூட வழங்கப்படாமல் இருந்தது.
இந்த சூழலில் ஜூன் 28ஆம் தேதி ஜார்கண்ட் மாநில உயர் நீதிமன்றம் ஹேமந்த் சோரனுக்கு ஜாமீன் வழங்கியது. அன்றைய தினமே அவர் விடுதலையானார். அதனைத் தொடர்ந்து சாம்பை சோரன் தனது முதலமைச்சர் பதவியை நேற்று ராஜினாமா செய்த நிலையில், ஜார்கண்ட் முக்தி மோர்ச்சா கட்சி எம்எல்ஏக்கள் கூடி, ஹேமந்த் சோரனை மீண்டும் தேர்வு செய்து, கவர்னர் சி.பி.ராதாகிருஷ்ணனிடம் மனு அளித்தனர். இந்நிலையில் ஹேமந்த் சோரன் முதலமைச்சர் பதவியை ஏற்க உள்ளதாக தகவல் வெளியாகியுள்ளது.
இன்னும் சில மாதங்களில் ஜார்கண்ட் மாநிலத்துக்கு சட்டமன்றத் தேர்தல் வர உள்ளதால் ஹேமந்த் சோரனுக்கு எதிரான கைது நடவடிக்கை அவரது கட்சிக்கு சாதகமான சூழலை உருவாக்கும் என எதிர்பார்க்கப்படுகிறது.
