செய்திகள்

கோடை வெயிலில்: பகல் 12 மணி முதல் மதியம் 3 மணி வரை மக்கள் அவசியமில்லாமல் வெளியே வர வேண்டாம்

அமைச்சர் மா.சுப்பிரமணியன் அறிவுரை

சென்னை, மே 4–

கோடை வெயிலில் இருந்து தற்காத்துக் கொள்ள, காலை 12 மணி முதல் மதியம் 3 மணி வரை மக்கள் அவசியமில்லாமல் வெளியே வர வேண்டாம் என அமைச்சர் மா.சுப்பிரமணியன் வலியுறுத்தியுள்ளார்.

சென்னை மாநகராட்சி தேனாம்பேட்டை மண்டலம் வார்டு- 123–ல் அமைந்துள்ள சென்னை நடுநிலைப் பள்ளியில் மருத்துவம் மற்றும் மக்கள் நல்வாழ்வுத் துறை சென்னை மாநகராட்சி பொது சுகதாரத் துறை இணைந்து நடத்தும் கோடைகால கடுமையான வெப்பம் மற்றும் வெப்ப அலை பாதிப்பு தடுப்பு விழிப்புணர்வு கண்காட்சியினை மக்கள் நல்வாழ்வுத் துறை அமைச்சர் மா.சுப்பிரமணியன் இன்று (4–ந் தேதி) தொடங்கிவைத்தார்.

பின்னர் அமைச்சர் செய்தியாளர் சந்திப்பில் தெரிவித்ததாவது:–

இந்திய வானிலை மையத்தின்அறிவுரைப்படி தற்பொழுது சென்னை, வேலூர், மதுரை, கரூர், திருவண்ணாமலை, ராணிப்பேட்டை, திருச்சி, திருப்பத்தூர் போன்ற மாவட்டங்களில் 100 டிகிரி பாரன்ஹீட்டுக்கு மேல் வெப்பம் பதிவாகி வருகிறது. கடுமையான கோடை வெயிலின் பாதிப்பு ஏற்பட்டுள்ளதால் முதலமைச்சரின் அறிவுரையின்படி பொதுமக்கள் அனைவரும் அரசின் பாதுகாப்பு வழி முறைகளை தவறாமல் பின்பற்ற வேண்டும்.

உங்களுக்கு தாகம் இல்லாவிட்டாலும், முடிந்தவரை போதுமான அளவு தண்ணீர் குடிக்கவும். பயணத்தின் போது குடிநீரை எடுத்துச் செல்லுங்கள். ஓ.ஆர்.எஸ். மற்றும் எலுமிச்சை தண்ணீர், இளநீர், மோர், பழச்சாறுகள் போன்ற வீட்டில் தயாரிக்கப்பட்ட பானங்களை சிறிது உப்பு சேர்த்து உட்கொள்ள வேண்டும். மேலும் முலாம்பழம், கஸ்தூரி முலாம்பழம், ஆரஞ்சு, திராட்சை, அன்னாசி, வெள்ளரி அல்லது உள்நாட்டில் கிடைக்கும் பிற பழங்கள் மற்றும் காய்கறிகள் போன்ற அதிக நீர்ச்சத்து கொண்ட பருவகால பழங்கள் மற்றும் காய்கறிகளை உண்ண வேண்டும்.

வெளிர்நிறங்களில் மெல்லிய தளர்வான பருத்தி ஆடைகளை அணிவது நல்லது. சூரிய ஒளியில் நேரடியாக வெளிப்படும் போது குடை, தொப்பி, துண்டு மற்றும் பிற பாரம்பரிய தலையை மூடும் பொருட்களை பயன்படுத்தவும். வெயிலில் வெளியே செல்லும் போது காலணிகள் அணியுங்கள். நல்ல காற்றோட்டம் மற்றும் குளிர்ந்த இடங்களில் இருக்கவும். வெளியில் செல்வதாக இருந்தால், உங்கள் வெளிப்புறச் செயல்பாடுகளை அன்றைய தினத்தின் குளிர்ச்சியான நேரங்களுக்குள் மேற்கொள்ளவும்.

12 மணி முதல்

3 மணி வரை

அதாவது காலை மற்றும் மாலை நண்பகலில் வெளியில் செல்வதை தவிர்க்கவும். குறிப்பாக மதியம் 12 மணி முதல் பிற்பகல் 3 மணி வரை. மதியம் வெளியில் செல்லும்போது கடினமான செயல்களைத் தவிர்க்கவும். வெறுங்காலுடன் வெளியே செல்லாதீர்கள். நண்பகலில் சமைப்பதைத் தவிர்க்கவும். சமையல் செய்யும் இடத்தை போதுமான அளவு காற்றோட்டம் செய்ய கதவுகள் மற்றும் ஜன்னல்களைத் திறக்கவும்.

ஆல்கஹால், தேநீர், காபி மற்றும் புட்டிகளில் அடைக்கப்பட்ட குளிர்பானங்கள் அல்லது அதிக அளவு சர்க்கரை கொண்ட பானங்கள் ஆகியவற்றைத் தவிர்க்கவும். இவை உண்ணும்போது அதிக உடல் திரவத்தை இழக்க வழிவகுக்கும் அல்லது வயிற்றுப் பிடிப்பை ஏற்படுத்தலாம். புரதச்சத்து அதிகம் உள்ள உணவைத் தவிர்க்கவும், பழைய உணவுகளை உண்ண வேண்டாம்.

கடுமையான கோடை வெயிலின் பாதிப்புகளை எதிர்கொள்வதற்காக அனைத்து மாவட்ட தலைமை மருத்துவமனைகள் மற்றும் மருத்துவக் கல்லூரி மருத்துவமனைகளில் தனி படுக்கைகள் ஒதுக்கப்பட்டு இதற்கான சிகிச்சை அளிப்பதற்கு இணைஇயக்குநர், மருத்துவப் பணிகள் மற்றும் மருத்துவக் கல்லூரி மருத்துவமனை டீனுக்கு அறிவுரை வழங்கப்பட்டுள்ளது.

8–ந் தேதி

மெகா தடுப்பூசி முகாம்

சுற்றி நெருப்பு, நடுவில் தமிழகம் என்பது போன்று தமிழகத்தை சுற்றியுள்ள மாநிலங்களில் கொரோனா தொற்று அதிகமாக உள்ளது. தமிழகத்தில் கட்டுப்பாட்டில் உள்ளது. தமிழகத்தில் வரும் 8 ஆம் தேதி மெகா தடுப்பூசி முகாம் 1 லட்சம் இடங்களில் நடைபெறவுள்ளது. அதற்கான ஏற்பாடுகள் செய்யப்பட்டு வருகிறது. சென்னையில் 3 ஆயிரம் இடங்களில் மெகா தடுப்பூசி முகாம்கள் அமைக்கப்படும். தடுப்பூசி செலுத்திக் கொள்ளாதவர்கள் மெகா தடுப்பூசி முகாமை பயன்படுத்திக்கொள்ள வேண்டும்.

எக்ஸ்இ வகை தொற்றால் பெரிய அளவில் பாதிப்பு இல்லை. அதனால், பெரிய அளவில் அச்சப்பட வேண்டியதில்லை. அந்த வகை தொற்றால் ஏற்படும் மரணங்கள் குறைவாகத்தான் உள்ளது. தமிழகத்தில் தற்போது வரை எக்ஸ்இ வகை தொற்று கண்டறியப்பட வில்லை.

இவ்வாறு அமைச்சர் மா.சுப்பிரமணியன் தெரிவித்தார்.

இந்நிகழ்ச்சியில் மேயர் ஆர்.பிரியா, துணை மேயர் மகேஷ் குமார், மக்கள் நழ்வாழ்வுத் துறை அரசு முதன்மை செயலாளர் ஜெ.ராதகிருஷ்னன், சென்னை மாநகராட்சி ஆணையர் ககன்தீப் சிங் பேடி, பொது சுகாதார குழு தலைவர் கோ. சாந்தகுமாரி, மண்டலக்குழு தலைவர் எஸ். மதன் மோகன், துணை ஆணையாளர்கள் எம்.எஸ்.பிராசாந்த், (பணிகள்), டி.சினேகா (கல்வி), எஸ். ஷேக் அப்துல் ரஹ்மான் (மத்திய வட்டாரம்) மற்றும் இயக்குனர் பொது சுகதாரம் நோய் தடுப்புத் துறை, மாநகர நல அலுவலர் மண்டல அலுவலர் மாமன்ற உறுப்பினர்கள் உட்பட பலர் கலந்து கொண்டனர்.

Leave a Reply

Your email address will not be published.