செய்திகள்

குஜராத் மாநிலத்தில் 12 ஆம் வகுப்பு பொதுத்தேர்வில் முறைகேடு புகார்: 959 மாணவர்கள் ஒரே பதில், தவறுகள்

Spread the love

அகமதாபாத், ஜூலை 20

குஜராத் மாநிலத்தில் நடைபெற்ற பொதுத்தேர்வில், 959 மாணவர்கள் ஒரே மாதிரி பதில் மற்றும் தவறுகளை செய்துள்ளது கண்டுபிடிக்கப்பட்டுள்ளது.

2019ஆம் ஆண்டு குஜராத் மாநில 12ஆம் வகுப்பு பொதுத்தேர்வில் ஏராளமான மாணவர்கள் காப்பி அடித்திருக்கலாம் என, புகார் எழுந்தது. குஜராத் மாநில இடைநிலை மற்றும் உயர்நிலைக் கல்வி வாரியம் நடவடிக்கை எடுக்க முடிவு செய்தது. அதன்படி, சிறப்பு விசாரணைக் குழு அமைக்கப்பட்டது. காப்பி அடித்திருப்பது பற்றி புகார் வந்த தேர்வு மையங்களில், தேர்வு எழுதிய மாணவர்களின் விடைத்தாள்கள் ஆராயப்பட்டன.

அப்போது 959 மாணவர்கள் தங்கள் விடைத்தாள்களில் ஒரே மாதிரியான பதிலையே அளித்திருப்பது தெரிந்தது. ஒருவர் செய்த தவறையை மற்றொருவரும் செய்துள்ளார் எனக் கண்டுபிடிக்கப்பட்டது. இதனால் 12ஆம் வகுப்பு பொதுத்தேர்வில் மெகா முறைகேடு நிகழ்ந்துள்ளது என்பது உறுதியானது.

முறைகேடு நடந்த ஒரு தேர்வு மையத்தில் 200-க்கும் மேற்பட்ட மாணவர்கள் ஒரு கட்டுரையை வார்த்தை மாறாமல் அப்படியே எழுதியுள்ளனர். கணக்கு, பொருளாதாரம், ஆங்கிலம் என பல தேர்வுகளில் காப்பி அடித்திருப்பதாகக் கூறப்படுகிறது. இதுதொடர்பாக உயர்மட்ட விசாரணைக்கு உத்தரவிடப்பட்டுள்ளது. காப்பி அடிப்பது கண்டுபிடிக்கப்பட்ட தேர்வு மையங்களில் நடந்த தேர்வுகள் ரத்து செய்யப்பட்டுள்ளன. காப்பி அடித்த மாணவர்களின் தேர்வு முடிவுகளை 2020ஆம் ஆண்டு வரை நிறுத்தி வைத்து உத்தரவிடப்பட்டுள்ளது.

குறிப்பாக, ஜுனாகத், கிர் சோம்னாத் ஆகிய மாவட்டங்களைச் சேர்ந்த தேர்வு மையங்களில் எழுதிய மாணவர்கள் அதிக அளவில் சிக்கியுள்ளனர். தேர்வு மைய கண்காணிப்பில் இருந்த ஆசிரியர்களே மாணவர்களுக்கு விடைகளைச் சொல்லிக்கொடுத்தனர் என சில மாணவர்கள் விசாரணைக் குழுவிடம் தெரிவித்துள்ளனர்.

Leave a Reply

Your email address will not be published. Required fields are marked *