செய்திகள்

கடலில் மிதக்கும் உலகின் ராட்சத பனிப்பாறை!

ரோனி, மே.21–

உலகிலேயே மிகப்பெரிய இன்னும் சொல்லப் போனால் ராட்சத பனிப்பாறை உடைந்து நொறுங்கி அண்டார்டிகா பனிப்பிரதேசத்தில் உள்ள வெட்டில் கடலில் மிதந்து கொண்டிருக்கிறது. இந்தப் பனிப்பாறை 170 கி.மீ. நீளம், 25 கி.மீ. அகலம், 4 ஆயிரத்து 320 சதுர கி.மீ. பரப்பளவு கொண்டது. கோப்பர் நிக்கஸ் சென்டினல் செயற்கைக் கோள் எடுத்து அனுப்பியிருக்கும் புகைப்படங்கள் மூலம் பனிப்பாறை உருகி கடலில் மிதந்து வருவது தெரிய வந்துள்ளது.

பனிப்பாறைகள் இப்படி உடைந்து நொறுங்கி பின் சிறுசிறு துண்டுகளாகி, உருகி தண்ணீராய் மாறி கடலில் கலப்பதன் மூலம் இப்போதிருக்கும் கடல் நீர் மட்டம் உயரும் அபாயம் இருக்கிறது.

வானிலை பருவ நிலை மாற்றம் எதிரொலியாக பனிப்பிரதேச பகுதிகளில் வெப்ப நிலை வேகமாக உயர்ந்து வருகிறது. இது அண்டார்டிகாவில் இன்னும் வேகமாக உயர்ந்து, பனிப்பாறைகள் உருகி நொறுங்கி கடலில் கலக்கும் நிலை ஏற்பட்டு வருகிறது. சர்வதேச அளவில் இந்த மாற்றம் நடந்து கொண்டு வருகிறது.

கடந்த வருடம் இதேபோல பெரிய பனிப்பாறையாக A–68 உடைந்து நொறுங்கி, சிறுசிறு துண்டுகளாகி, கடல் நீரில் கரைந்தது.

முழுக்க முழுக்கப் பனிப்பாறை

பூமியின் தென் துருவத்தில் அமைந்துள்ள அண்டார்ட்டிகா கண்டமானது, முழுக்க முழுக்கப் பனிப்பாறைகளையும், பனி மலைகளையும் கொண்ட உறைநிலை குளிர்ப் பிரதேசமாகும். இந்த கண்டத்தில் இந்தியா உள்பட பல்வேறு நாடுகளைச் சேர்ந்த ஆராய்ச்சியாளர்கள், ஆய்வு கூடங்களை அமைத்து ஆராய்ச்சிப் பணியில் ஈடுபட்டு வருகிறார்கள்.

இதற்கிடையில் உலகில் தற்போது நிலவி வரும் புவி வெப்பம் காரணமாக பூமியின் தெற்கு முனையைச் சேர்ந்த இந்த குளிர்ப் பிரதேசமான அண்டார்ட்டிகாவில் பனிப்பாறைகளும், பனி மலைகளும் நாள்தோறும் உருகத் தொடங்கியிருக்கின்றன. இதன் காரணமாக கடல் மட்டம் உயரும் அபாயம் இருப்பதாக ஆராய்ச்சியாளர்களும், சமூக ஆர்வலர்களும் நீண்ட காலமாகவே உலக நாடுகளை எச்சரித்து வருகின்றனர்.

இந்த நிலையில் அண்டார்ட்டிகா கண்டத்தில் இருந்து தற்போது ஒரு பிரம்மாண்டமான பனிப்பாறை தனியாக பிரிந்து சென்றுள்ளது. இந்த பனிப்பாறை 4,320 சதுர கி.மீ. பரப்பளவு கொண்டது 175 கி.மீ. நீளமும், 25 கி.மீ. அகலமும் கொண்டது என்று ஐரோப்பிய விண்வெளி ஆய்வு நிறுவனம் தெரிவித்துள்ளது.

நியூயார்க் நகரைவிட 4 மடங்கு பெரியது

இந்த பனிப்பாறைக்கு ஏ-76 என விஞ்ஞானிகள் பெயரிட்டுள்ளனர். பூமியில் தற்போது உள்ள பனிப்பாறைகளிலேயே இது தான் மிகப்பெரியது என்று கூறப்படுகிறது. அமெரிக்காவின் நியூயார்க் நகரின் பரப்பளவு 1,213 சதுர கி.மீ ஆகும். இதன்படி இந்த ஏ-76 பனிப்பாறையானது பரப்பளவில் அமெரிக்காவின் நியூயார்க் நகரை விட 4 மடங்கு பெரியது ஆகும். இந்தியாவின் தலைநகர் டெல்லியைப் போல 3 மடங்கு பெரிய பனிப்பாறை இது.

இருப்பினும் இந்த பனிப்பாறை ஏற்கனவே வெடெல் கடலில் மிதக்கத் துவங்கி இருந்ததாகவும், இதன் காரணமாக கடல் நீர்மட்டம் உயர்வதற்கு வாய்ப்புகள் குறைவு என்றும் விஞ்ஞானிகள் தெரிவித்துள்ளனர். மேலும் பருவநிலை மாற்றத்திற்கும் இதற்கும் தொடர்பு இல்லை என்றும் இந்த ஏ-76 பனிப்பாறை இன்னும் சில காலத்தில் இது 2 அல்லது 3 துண்டுகளாக பிரிந்து சென்றுவிடும் என்றும் ஆய்வாளர்கள் கூறுகின்றனர்.

Leave a Reply

Your email address will not be published. Required fields are marked *