டெல்லி, நவ. 29–
முன்னாள் முதலமைச்சர் ஓ.பன்னீர்செல்வத்திற்கு எதிரான சொத்து குவிப்பு வழக்கின் மறுவிசாரணைக்கு உத்தரவிட்ட உயர்நீதிமன்ற நீதிபதி ஆனந்த் வெங்கடேஷின் உத்தரவுக்கு உச்சநீதிமன்றம் இடைக்கால தடை விதித்துள்ளது.
2001 – 2006ல் அ.தி.மு.க. ஆட்சியின் போது, வருவாய்த் துறை அமைச்சராக பதவி வகித்த ஓ.பி.எஸ் வருமானத்திற்கு அதிகமாக ரூ.1,77 கோடி சொத்து சேர்த்ததாக, தி.மு.க., ஆட்சியின் போது லஞ்ச ஒழிப்புத்துறை வழக்குப்பதிவு செய்தது. இந்த வழக்கில், ஓ.பி.எஸ். மனைவி விஜயலட்சுமி, மகனும் முன்னாள் எம்.பி.யுமான ரவீந்திரநாத் குமார் உள்பட அவரது உறவினர்கள் மீதும் குற்றம்சாட்டப்பட்டது.
பல ஆண்டுகளாக இந்த வழக்கு நடைபெற்று வந்த நிலையில், மீண்டும் அ.தி.மு.க. ஆட்சியமைந்த போது, வழக்கை திரும்பப்பெற்றுக் கொள்வதாக தமிழ்நாடு அரசு அறிவித்தது. இதையடுத்து, கடந்த 2012 ஆம் ஆண்டு, போதிய ஆதாரங்கள் இல்லை எனக் கூறி, ஓ.பிஎஸ். உள்ளிட்ட அனைவரையும் இந்த வழக்கில் இருந்து விடுவித்து சிவகங்கை நீதிமன்றம் தீர்ப்பளித்தது.
இடைக்கால தடை
இந்த வழக்கை தானாக முன்வந்து விசாரணைக்கு எடுத்த சென்னை உயர்நீதிமன்ற நீதிபதி ஆனந்த் வெங்கடேஷ், சிவகங்கை நீதிமன்றம் அளித்த தீர்ப்பை ரத்து செய்தார். மேலும், இது தொடர்பான வழக்கை மதுரை சிறப்பு நீதிமன்றத்தில் நடத்த வேண்டும் என்றும் ஆணையிட்டார். இதையடுத்து, தன் மீதான சொத்து குவிப்பு வழக்கை மறுவிசாரணை செய்ய தடை விதிக்க வேண்டும் என்று வலியுறுத்தி ஓ.பி.எஸ். தரப்பில் சுப்ரீம் கோர்ட்டில் மேல்முறையீடு செய்யப்பட்டது.
இதனை விசாரித்து வந்த உச்சநீதிமன்றம், ஓ.பி.எஸ்–க்கு எதிரான சொத்து குவிப்பு வழக்கை மறு விசாரணை செய்ய இடைக்கால தடை விதித்து தீர்ப்பளித்துள்ளது. மேலும் சிறப்பு நீதிமன்றத்தின் அதிகாரத்தை சென்னை ஐகோர்ட் எடுத்துக் கொண்டு, குற்றச்சாட்டு பதிவு செய்ய உத்தரவிட்டுள்ளது. ஆனால், ஓ.பி.எஸ். மீதான சொத்துக் குவிப்பு வழக்கில் சிறப்பு நீதிமன்றமே முடிவு எடுக்க வேண்டும்’ எனவும் நீதிபதிகள் அறிவுறுத்தியுள்ளனர்.
