ஜெனிவா, டிச.15–
ஐ.நா. சபையில் காஷ்மீர் பிரச்சினையை எழுப்பிய பாகிஸ்தானுக்கு இந்தியா தக்க பதிலடி கொடுத்துள்ளது.
நியூயார்க்கில் உள்ள ஐ.நா தலைமையகத்தில் இந்தியா பரிசாக அளித்த மகாத்மா காந்தி சிலையை இந்திய வெளியுறவு அமைச்சர் ஜெய்சங்கர், ஐ.நா பொதுச்செயலாளர் ஆன்டனியோ குட்ரெஸ் ஆகியோர் திறந்து வைத்தனர்.
ஐ.நா பாதுகாப்பு கவுன்சிலின் தலைமை பொறுப்பை, அந்த கவுன்சிலின் உறுப்பு நாடுகள் மாதந்தோறும் சுழற்சி முறையில் ஏற்கும். இதன் தொடர்ச்சியாக டிசம்பர் மாதத்தின் தலைமை பொறுப்பை இந்தியா ஏற்றுள்ளது. இந்நிலையில், அமெரிக்காவின் நியூயார்க் நகரில் உள்ள ஐ.நா சபை தலைமையகத்தில் இந்தியா பரிசாக அளித்த மார்பளவு மகாத்மா காந்தி சிலை திறக்கப்பட்டது. இந்திய வெளியுறவுத்துறை அமைச்சர் ஜெய்சங்கரும், ஐ.நா பொதுச்செயலாளர் ஆன்டனியோ குட்டரெஸ்- ஆகியோர் இந்த சிலையை திறந்து வைத்தனர்.
குஜராத்தில் உள்ள பிரமாண்டமான சர்தார் வல்லபாய் படேல் சிலையை வடிவமைத்த ராம் சுதார் என்ற பிரபல சிற்பி தான், இந்த காந்தி சிலையையும் உருவாக்கி உள்ளார். தற்போது ஐ.நா.,வில் திறக்கப்பட்டுள்ள மகாத்மா காந்தி சிலை இந்தியாவின் 2வது பரிசாகும். ஏற்கெனவே கடந்த 1982ம் ஆண்டு ஜூலை 26ம் தேதி இந்தியா சார்பில் ஐ.நா.,வுக்கு சூர்ய பகவான் சிலையை அப்போதைய பிரதமர் இந்திரா காந்தி பரிசாக அளித்தார். அது பாலப் பேரரசு கால 11ம் நூற்றாண்டு கருங்கல் சிலையாகும். அந்த சிலைதான் ஐ.நா.வுக்கு இந்தியா அளித்த முதல் பரிசு.
அதன் பின்னர் ஐ.நா., பாதுகாப்பு குழு கவுன்சில் கூட்டத்தில் பங்கேற்ற வெளியுறவுத் துறை அமைச்சர் ஜெய்சங்கர், பாகிஸ்தானை கடுமையாக சாடினார்.
நேற்று நடந்த ஆலோசனைக் கூட்டத்தின் போது பேசிய பாகிஸ்தான் வெளியுறவு அமைச்சர் பிலாவல் பூட்டோ காஷ்மீர் பிரச்சினையை எழுப்பினார்.
அதற்கு பதிலளித்த இந்திய வெளியுறவு அமைச்சர் ஜெய்சங்கர், “எல்லை தாண்டிய பயங்கரவாதத்தை இந்த அவை கண்டிக்க வேண்டும். பாகிஸ்தான் ஒசாமா பின்லேடனுக்கு நற்சான்று கொடுத்து கொண்டாடி வருகிறது.
அண்டைய நாட்டின் பார்லிமெண்ட் மீது தாக்குதல் நடத்தியதற்கு ஆதரவு அளிப்பது போன்ற செயல்களில் பாகிஸ்தான் ஈடுபட்டு வருகிறது. இவ்வாறு இருக்கும்போது பாகிஸ்தான் தன்னை நியாயப்படுத்தி, உபதேசம் செய்யும் தகுதி இல்லை என காட்டமாக பதிலடி கொடுத்தார்.
