செய்திகள்

எல்லையில் பாகிஸ்தான் நடத்திய திடீர் தாக்குதலுக்கு இந்தியா பதிலடி

ஸ்ரீநகர், அக்.27–

எல்லையில் பாகிஸ்தான் நடத்திய திடீர் தாக்குதலுக்கு, இந்தியா பதிலடி கொடுத்துள்ளது.

பாகிஸ்தானுடனான சர்வதேச எல்லைப்பகுதியில் இந்திய எல்லைப் பாதுகாப்புப்படையினர் தீவிர பாதுகாப்புப் பணியில் ஈடுபட்டு வருகின்றனர். பாகிஸ்தானில் இருந்து இந்தியாவுக்குள் அத்துமீறி நுழைய முயற்சிக்கும் பயங்கரவாதிகளை தடுக்கும் நடவடிக்கையில் அவர்கள் ஈடுபட்டு வருகின்றனர்.

இந்நிலையில் ஜம்மு–காஷ்மீர் யூனியன் பிரதேசம் ஜம்முவின் அரினா செக்டார் பகுதியில் சர்வதேச எல்லையில் இந்திய எல்லைப் பாதுகாப்புப்படையினர் நேற்று வழக்கமான பாதுகாப்புப் பணியில் ஈடுபட்டுக் கொண்டிருந்தனர். அப்போது, எல்லையில் உள்ள இந்திய நிலைகளை குறிவைத்து பாகிஸ்தான் ராணுவம் திடீர் தாக்குதல் நடத்தியது. நேற்று இரவு 8 மணியளவில் துப்பாக்கிச்சூடு மற்றும் சிறிய ரக பீரங்கிகளை வீசி பாகிஸ்தான் தாக்குதல் நடத்தியது. இந்த தாக்குதலில் பாதுகாப்புப்படை வீரர் படுகாயமடைந்தார். அவர் ஜம்முவில் உள்ள மருத்துவமனையில் சிகிச்சைக்காக அனுமதிக்கப்பட்டுள்ளார். பாகிஸ்தான் திடீர் தாக்குதல் நடத்திய நிலையில், இந்தியா பதிலடி தாக்குதல் நடத்தியது. எல்லையில் பாதுகாப்பு படையினர் கூடுதலாக குவிக்கப்பட்டனர். அங்கு பதற்றமான சூழ்நிலை நிலவி வருகிறது.

Loading

Leave a Reply

Your email address will not be published. Required fields are marked *