நியூயார்க், மார்ச் 6–
அமெரிக்க அதிபர் டொனால்டு டிரம்ப் சீனாவுக்கு எதிரான வரிகளை உயர்த்தி வர்த்தக போரை தொடங்கியுள்ள நிலையில், எந்த மாதிரி போருக்கும் தாங்கள் தயாராக இருக்கிறோம் என சீனா பதிலடி கொடுத்துள்ளது.
அமெரிக்க அதிபர் டொனால்டு டிரம்ப் தங்களுடன் வர்த்தகம் செய்து வரும் பல்வேறு நாடுகளின் வரியை உயர்த்தி வருகிறார். மெக்ஸிகோ, கனடா மற்றும் சீனா ஆகிய நாடுகளின் வரியை 25 சதவீதம் உயர்த்தி அறிவித்துள்ளார். இதற்கு கனடா பிரதமர் ஜஸ்டின் ட்ரூடோ கடுமையாக பதிலடி கொடுத்தார். இதேபோல் மெக்ஸிகோவும் அமெரிக்காவின் நடவடிக்கைக்கு கண்டனம் தெரிவித்து வருகிறது.
இந்நிலையில் அமெரிக்க நாடாளுமன்ற கூட்டுக்குழு கூட்டத்தில் முதல் முறையாக நேற்று உரையாற்றிய அதிபர் டொனால்டு டிரம்ப், அமெரிக்காவுக்கு எப்படி மற்றவர்கள் வரி விதிக்கிறார்களோ அதே வரியை அமெரிக்காவும் திரும்ப விதிக்கும் என திட்டவட்டமாக தெரிவித்தார். மேலும் பல நாடுகள் அமெரிக்காவுக்கு எதிராக பல ஆண்டுகளாக அதிக வரியை விதித்து வருவதாகவும் குற்றசாட்டிய டிரம்ப், ஐரோப்பிய ஒன்றியம், சீனா, பிரேசில், இந்தியா, மெக்சிகோ மற்றும் கனடா ஆகிய நாடுகள் தங்களிடம் அதிக வரியை வசூலிப்பதாக தெரிவித்தார். தனது தலைமையிலான அரசு தங்களிடம் அதிக வரியை வசூலிக்கும் நாடுகளிடம் அதேபோல் அதிக வரியை விதிக்கும் என்றும் தெரிவித்திருந்தார்.
எந்த போருக்கும் தயார்
இந்நிலையில் அமெரிக்க அதிபரின் வரி உயர்வு முடிவுக்கு சீனா பதிலடி கொடுத்துள்ளது. டிரம்ப் அனைத்து சீனப் பொருட்களுக்கும் அதிக வரிகளை விதித்ததைத் தொடர்ந்து, உலகின் இரண்டு முன்னணி பொருளாதார நாடுகள் வர்த்தகப் போரை நெருங்கி வருகின்றன. அமெரிக்க விவசாயப் பொருட்களுக்கு 10-15% வரிகளை விதித்ததற்கு சீனா அமெரிக்காவை எச்சரிக்கும் வகையில் பதிலடி கொடுத்துள்ளது.
இதுதொடர்பாக அமெரிக்காவில் உள்ள சீன தூதரகம் பதிவிட்டுள்ள டுவீட்டில், “அமெரிக்கா விரும்புவது போரைத்தான் என்றால், அது வரிப் போராக இருந்தாலும் சரி, வர்த்தகப் போராக இருந்தாலும் சரி அல்லது வேறு எந்த வகையான போராக இருந்தாலும் சரி, நாங்கள் இறுதிவரை போராடத் தயாராக இருக்கிறோம்” என்று குறிப்பிட்டுள்ளது.
டொனால்டு டிரம்ப் அமெரிக்க அதிபர் ஆனதில் இருந்து சீனாவிலிருந்து இதுவரை எழுந்துள்ள வலுவான கண்டனங்களில் இது முக்கியமானதாக பார்க்கப்படுகிறது. சீனப் பொருட்களுக்கு முன்னர் விதிக்கப்பட்ட 10 சதவீத வரிகளை டிரம்ப் 20 சதவீதமாக உயர்த்தியுள்ளார். இதைத்தொடர்ந்து அமெரிக்காவிற்கு எதிராக உலக வர்த்தக அமைப்பில் சீனா புகார் அளித்துள்ளது குறிப்பிடத்தக்கது.
