ஒவ்வோர் ஆண்டும் ஜனவரி 5 அன்று அனுசரிக்கப்படும் தேசிய பறவைகள் நாள் (National Birds Day), மனித வாழ்வுக்கும் இயற்கைச் சமநிலைக்கும் பறவைகள் அளிக்கும் பங்களிப்பை நினைவூட்டும் நாளாகும். உயிரியல் சங்கிலியின் முக்கியக் அங்கமாக உள்ள பறவைகள், வன சூழலையும் வேளாண் அமைப்பையும் சமநிலைப் படுத்துகின்றன. ஆனால் நகரமயமாக்கல், வனச்சுருக்கம், காலநிலை மாற்றம் ஆகியவற்றால் பறவைகளின் வாழ்விடம் நாளுக்கு நாள் குறைந்து வருகிறது.
விவசாயம்–பறவைகள் இணை வாழ்வின் சிறந்த எடுத்துக்காட்டாக சென்னையின் அருகாமையில் உள்ள வேடந்தாங்கல் பறவைகள் சரணாலயம் இருக்கிறது. தமிழ்நாட்டின் முக்கிய சுற்றுச்சூழல் பாரம்பரியமும் இது தான்.
இந்தியாவின் தேசிய பறவை – மயில், நாட்டின் பண்பாட்டு அடையாளமாக மட்டுமல்லாமல், உயிரியல் வளத்தின் சின்னமாகவும் விளங்குகிறது. மத்திய அரசு வனவிலங்கு பாதுகாப்புச் சட்டம் (1972), தேசிய பல்லுயிர் செயல் திட்டம் போன்றவற்றின் மூலம் பறவைகள் பாதுகாப்பை வலியுறுத்தி வருகிறது. தேசிய பறவை கணக்கெடுப்பு, ஈரநிலப் பாதுகாப்பு திட்டங்கள் ஆகியவை மத்திய அரசின் முக்கிய முயற்சிகளாகும்.
இயற்கைக்கான முதலீடு:
தமிழ்நாட்டில், வேடந்தாங்கல், கரிகில்லி, கூந்தங்குளம், உப்பாறு போன்ற ஏராளமான பறவைகள் சரணாலயங்கள் மாநில அரசின் பாதுகாப்பு முயற்சிகளுக்குச் சான்றாக உள்ளன. பள்ளி மாணவர்களுக்கு பறவை கண்காணிப்பு விழிப்புணர்வு, வனத்துறை–உள்ளூர் சமூக இணைப்பு, ஈரநில மீட்பு திட்டங்கள் ஆகியவை மாநிலத்தின் முக்கிய நடவடிக்கைகள். குறிப்பாக, குடிநீர் ஆதாரங்களை பாதுகாப்பதன் மூலம் பறவைகளின் வாழ்விடத்தையும் காக்கும் அணுகுமுறை தமிழகத்தில் வலுப்பெற்று வருகிறது.
தேசிய பறவைகள் நாள் ஒரு விழிப்புணர்வு நாளாக மட்டுமல்லாமல், பொது மக்களின் பொறுப்பை நினைவூட்டும் நாளாக மாற வேண்டும். மரம் நடுதல், நீர்நிலைகள் பாதுகாப்பு, பிளாஸ்டிக் பயன்பாடு குறைப்பு போன்ற எளிய செயல்களே பறவைகள் பாதுகாப்பில் பெரும் மாற்றத்தை உருவாக்க முடியும். பறவைகளை காக்கும் முயற்சி என்பது இயற்கையை காப்பதற்கான முதலீடு என்பதை மறந்துவிடக்கூடாது.
