டெல்லி, செப். 26–
இந்திய பங்குச் சந்தை குறியீடுகளான சென்செக்ஸ் மற்றும் நிஃப்டி இன்று புதிய உச்சத்தை எட்டியுள்ளது.
இந்திய பங்குச் சந்தைகளில் அந்நிய நாட்டு முதலீட்டு நிறுவனங்கள் மற்றும் உள்நாட்டு முதலீட்டாளர்கள் கணிசமான அளவு முதலீடு செய்துள்ளனர். மேலும் அமெரிக்க, ஐரோப்பிய மற்றும் ஆசிய நாடுகளின் பங்குச் சந்தைகளில் காணப்படும் வர்த்தக செயல்பாடுகளின் தாக்கம் இந்திய பங்குச்சந்தைகளில் எதிரொலிக்கிறது.
எழுச்சி பெற்ற பங்குச்சந்தை
மறுபுறம் உலக நாடுகளின் பொருளாதார வளர்ச்சி பற்றிய நம்பிக்கையான கணிப்புகள், இந்திய நிறுவனங்களின் செயல்பாடுகளில் சிறப்பான வளர்ச்சி உள்ளிட்ட காரணங்களால் இந்திய பங்குச்சந்தைகளில் அதிக எழுச்சியுடன் வர்த்தகம் நடைபெற்று வருகிறது.
கடந்த சில நாள்களாக பங்குச் சந்தை வணிகம் எழுச்சியுடனே காணப்படுகிறது. இந்த சூழலில், இந்திய பங்குச் சந்தை வர்த்தகம் புதிய உச்சத்தை தொட்டுள்ளது. மும்பை பங்குச்சந்தையின் குறியீட்டு எண் சென்செக்ஸ் 85 ஆயிரம் புள்ளிகளை கடந்தும், தேசிய பங்குச்சந்தையின் குறியீட்டு எண் நிஃப்டி 26 ஆயிரம் புள்ளிகளை கடந்தும் வர்த்தகம் நடைபெற்று வருகிறது.
