செய்திகள்

இந்தியாவிலும் 12 புதிய அணு உலைகள் நிறுவ திட்டம்: அணுசக்தி துறைத் தலைவர் கே.என். வியாஸ் தகவல்

சென்னை, ஏப்.20

“மின் உற்பத்திக்காக, மேலும் 12 அணு உலைகளை இந்தியா நிறுவ திட்டமிடப்பட்டுள்ளது” என்று ரஷ்யாவில் நடைபெற்ற சர்வதேச அணுசக்தி கண்காட்சியில், இந்திய அணுசக்தித் துறைத் தலைவர் கே.என்.வியாஸ் தெரிவித்தார்.

ரஷியாவில் உள்ள கோச்சி என்ற நகரில் அண்மையில் 11-வது சர்வதேச அணுசக்தித்துறை கண்காட்சி நடந்தது. ‘ரொசாட்டம்’ என்ற அமைப்பின் ஆதரவுடன் நடந்த இந்த கண்காட்சியில் 74 நாடுகளை சேர்ந்த விஞ்ஞானிகள் உள்பட 3,600 பேர் கலந்துகொண்டனர். இந்த நிகழ்ச்சியில், மருத்துவம், விண்வெளிப் பயணம் மற்றும் ஆராய்ச்சி, துருவப் பிரதேசமான ‘ஆர்டிக்’ பகுதியில் மேற்கொள்ளப்படும் ஆய்வுகள் என பல்வேறு துறைகளில் அணுக்கரு தொழில்நுட்பத்தைப் பயன்படுத்துவதற்கான வாய்ப்புகள் குறித்து ஆலோசிக்கப்பட்டது.

இந்த சர்வதேச கண்காட்சிக்கு வாழ்த்து தெரிவித்துள்ள ரஷிய அதிபர் விளாடிமிர் புதின், இந்த நிகழ்ச்சி அணுமின் தொழில்நுட்பத்தில் ரஷியாவின் தற்போதைய நிலைக்கு மேலும் வலுவூட்டுவதாக அமைந்துள்ளது’ என்று கூறியுள்ளார்.

அதேபோல, இந்த சர்வதேச கண்காட்சி, நல்வாழ்வுக்கு உதவும் அணுக்கதிர் வீச்சு என்பது குறித்தும், எதிர்காலத் தேவைகளுக்கு அமையப் போகும் புதிய தொழில்நுட்பங்கள் குறித்தும் விவாதிப்பதற்காக நடத்தப்பட்டது என்று ரொசாட்டம் அமைப்பின் பொதுமேலாளர் அலெக்ஸி விக்காசேவ் கூறினார்.

இந்த சர்வதேசக் கண்காட்சியில், இந்திய அணுசக்தித் துறைத் தலைவர் கே.என். வியாஸ் கலந்துகொண்டார். அப்போது அவர் பேசியதாவது:- அணுசக்தி தூய்மையானது மட்டுமல்ல; சாமானியர்களின் வாழ்க்கையில் பல முன்னேற்றங்களுக்கு வழிவகுக்கக் கூடியது. “சுற்றுப்புறச் சூழலில் எந்தவிதமான மாசுவையும் ஏற்படுத்தாமல், தூய்மையான எரிசக்தியாக திகழ்வதில் ஒப்பிட எதுவுமே இல்லாத அளவுக்கு ஈடு இணையற்றதாக இருப்பது அணு மின்சக்தி தான். அதுமட்டுமல்ல; மக்களது வாழ்நிலையில் பல முன்னேற்றங்களை ஏற்படுத்த வல்லது அணுக்கரு தொழில்நுட்பம் ஆகும்.

அதற்கு சாட்சியாக, உள்நாட்டு தொழில்நுட்பத்திலேயே தயாரிக்கப்பட்ட – இந்தியாவின் கைகா அணுமின் உற்பத்தி நிலையத்தில் 220 முதல் 250 மெகாவாட் மின்சாரம் தொடர்ந்து 962 நாட்களாக 99.3 சதவீத உற்பத்தித் திறனுடன் செயல்பட்டு வருவதைச் சொல்லலாம். அதோடு, நமது சொந்த முயற்சியில் இந்தியாவில் மேற்கொள்ளப்பட்டு வரும் அணுமின் உற்பத்தி திட்டத்தின் முதல்கட்டம்தான் இது. இதில் நல்ல முன்னேற்றமும் வளர்ச்சியும் கண்டு, ஏற்புடைய நிலையை நாம் எட்டியுள்ளோம்.

தற்போது இந்தியாவில், கனநீர் கொண்டு இயங்கும் 18 அணு உலைகள் செயல்பாட்டில் இருந்து வருகின்றன. மேலும், கனநீர் அடிப்படையிலான 10 புதிய உயர் அழுத்த அணுமின் உலைகளை அமைக்க பிரதமர் நரேந்திர மோடி ஒப்புதல் அளித்துள்ளார். அதோடு, மென்னீர் அடிப்படையில் செயல்படும் புதிய 2 அணு உலைகளை அமைக்கவும் இந்தியா திட்டமிட்டு வருகிறது. இந்த 12 அணு உலைகளும் இந்தியாவில் நிறுவப்படும்.

அணு துறையினால், தற்போது, இந்திய தொழில் நிறுவனங்கள் முன்னேற்றங்களை கண்டுள்ளன. அணு மின்சக்தி மற்றும் அத்துறை தொடர்பான பிற சாதனங்களின் உற்பத்தி முறை மிகச் சரியாகவும், தர அடிப்படையில் மிகச் சிறந்ததாகவும் அமைய வேண்டியுள்ளது. அதனால், இந்த துறைக்கான உபகரணங்களையும், எந்திரங்களையும் உற்பத்தி செய்ய நினைக்கும் நிறுவனங்கள், அதற்குத் தேவைப்படும் தரத்துக்கு தங்களை மேம்படுத்திக்கொள்கின்றன. எனவே, அணுஉலைகள் மின்உற்பத்தியில் மட்டுமின்றி, ஒட்டுமொத்த சமூகமும் மேம்படவும் உதவும்.

இந்தியாவை பொறுத்தவரையில், அணுக் கதிர் தொழில்நுட்பத்தைக் கொண்டு, பல்வேறு புதிய கண்டுபிடிப்புகள் தொடங்கியுள்ளன. அதில் குறிப்பாக, மருத்துவத் துறையில் பயன்படுத்தப்படும் கதிர்வீச்சு தொழில் நுட்ப சாதனம். கேன்சர் உள்ளிட்ட வலி நிறைந்த நோய்களுக்கான சிகிச்சையில் பயன்படுத்தப்படுவதைச் சொல்லலாம். இதன் மூலம் குறைந்த செலவில் – 60 சதவீதம் மேம்பட்ட சிகிச்சையை வழங்கி, புற்றுநோய் பாதித்த திசுகளைத் தேர்ந்தெடுத்து அழித்துவிட முடிகிறது” என்று கூறினார்.

Leave a Reply

Your email address will not be published. Required fields are marked *