செய்திகள் போஸ்டர் செய்தி

இந்தியாவின் முதல் கொரோனா தடுப்பூசி; மனிதர்களுக்கு போட்டு பரிசோதிக்க மருந்து கட்டுப்பாட்டு ஆணையம் அனுமதி

டெல்லி, ஜூன் 30-

‘உயிர்க்கொல்லி’ கொரோனா வைரஸைத் தடுக்கும் வகையில் கண்டுபிடிக்கப்பட்டுள்ள இந்தியாவின் முதல் தடுப்பூசியை பரிசோதனை செய்து பார்க்க, இந்திய மருந்து கட்டுப்பாட்டு ஆணையத்தின் ஒப்புதல் கிடைத்துள்ளது.

தெலங்கானா மாநிலத்தில் உள்ள பாரத் பயோடெக் நிறுவனம் மற்றும் இந்திய மருத்துவ ஆராய்ச்சி கவுன்சில் ஆகியவை இணைந்து, கொரோனா வைரஸிற்கு எதிரான இந்தியாவின் முதல் தடுப்பூசியை கண்டுபிடித்துள்ளன. இதனை மனிதர்கள் மீது முதல் மற்றும் இரண்டாம் கட்டமாக பரிசோதனை செய்ய இந்திய மருந்து கட்டுப்பாட்டு ஆணையம் அனுமதி அளித்துள்ளது.

அதன்படி, அடுத்த மாதம் (ஜூலை) மாதம் பரிசோதனைகள் தொடங்கும் என்று பாரத் பயோடெக் நிறுவனம் தரப்பில் தெரிவிக்கப்பட்டுள்ளது. புனேவில் உள்ள தேசிய வைரலாலஜி நிறுவனத்தில் கொரோனா வைரஸ் நுண்ணுயிரியை பிரித்தெடுத்து பாரத் பயோடெக் நிறுவனத்திற்கு அனுப்பி வைத்துள்ளனர்.

இதையடுத்து ஐதராபாத்தின் ஜீனோம் வேலியில் அமைந்துள்ள பாரத் பயோடெக் BSL-3 உயர் கட்டுப்பாட்டு மையத்தில் தடுப்பூசி கண்டுபிடிக்கப்பட்டது. இதுதொடர்பாக ஆய்வின் முழு விவரம், மருந்தின் பாதுகாப்பு அம்சம் மற்றும் நோய் எதிர்ப்பு திறன் ஆகியவை பற்றி மத்திய சுகாதாரம் மற்றும் குடும்ப நலத்துறை அமைச்சகம் மற்றும் இந்திய மருந்து கட்டுப்பாட்டு ஆணையத்திற்கு அனுப்பி வைக்கப்பட்டுள்ளது.

அதன் அடிப்படையில் மனிதர்கள் மீதான முதல் மற்றும் இரண்டாம் கட்ட ஆய்வுகளுக்கு அனுமதி அளிக்கப்பட்டுள்ளது. இதுபற்றி பாரத் பயோடெக் நிறுவனத்தின் தலைவரும், மேலாண் இயக்குநருமான கிருஷ்ணா எல்லா கூறுகையில், இந்தியாவிலேயே தயாரிக்கப்பட்ட கோவிட்-19 தடுப்பூசி கோவாக்சின்–ஐ அறிமுகம் செய்து வைப்பதில் பெருமைப்படுகிறோம். இதில் ஐசிஎம்ஆர் மற்றும் என்ஐவி ஆகியவை சிறப்பான ஒத்துழைப்பு வழங்கின. இந்த தடுப்பூசியை பயன்பாட்டிற்கு கொண்டு வர தீவிர முயற்சியில் ஈடுபட்டுள்ளோம் என்றார்.

இந்நிறுவனத்தின் இணை மேலாண் இயக்குநர் சுசித்ரா எல்லா கூறுகையில், தற்போதைய இக்கட்டான சூழலில் இருந்து மீண்டு வரும் நோக்கில் எங்கள் ஆராய்ச்சியை செலுத்தினோம்.

இதுவே கோவிட்-19 தொற்றுக்கு வெற்றிகரமாக தடுப்பூசி கண்டுபிடிக்க உதவியது. வருங்காலத்தில் பெரும் நோய்த் தொற்றுக்கு எதிராக இந்தியாவின் சிறப்பான நடவடிக்கையாக அமையும் வகையில் எங்களது முயற்சி அமைந்துள்ளது என்றார்.

முன்னதாக போலியோ, ரேபிஸ், ரோடா வைரஸ், ஜப்பானிய என்செபாலிட்டிஸ், சிக்கன் குனியா, ஸிகா ஆகியவற்றுக்கு எதிராக பாரத் பயோடெக் நிறுவனம் தடுப்பூசிகளை கண்டுபிடித்து சாதனை படைத்துள்ளது.

‘உயிர்க்கொல்லி’ கொரோனா– உலகம் முழுவதும் 5 லட்சம் பேரை பலிவாங்கியிருக்கிறது. இந்தியாவில் 16 ஆயிரத்து 475 பேர் உயிரிழந்திருக்கிறார்கள். 1 கோடியே 10 ஆயிரம் பேர் பாதிக்கப்பட்டுள்ளனர். உலக அளவில் மிகவும் மோசமாக பாதிக்கப்பட்டுள்ள நாடுகளின் பட்டியலில் இந்தியா 4–ம் இடத்தில் இருக்கிறது.

Leave a Reply

Your email address will not be published. Required fields are marked *