செய்திகள்

ஆளுநரை திரும்ப பெறும் வரை போராட்டம் : தார்பாயில் உறங்கிய முதல்வர், அமைச்சர்கள்

புதுச்சேரி, ஜன. 10-

கிரண்பேடியை மத்திய அரசு திரும்ப பெறும் வரை எங்களது பலகட்ட போராட்டங்கள் தொடரும் என முதலமைச்சர் நாராயணசாமி எச்சரிக்கை விடுத்துள்ளார்.

புதுச்சேரி துணைநிலை ஆளுநரின் செயல்பாட்டைக் கண்டித்தும் துணை நிலை ஆளுநர் புதுச்சேரி விட்டு வெளியேற வேண்டும் என வலியுறுத்தி காங்கிரஸ் மற்றும் கூட்டணிக் கட்சிகள் சார்பில் அண்ணா சதுக்கம் அருகே நேற்று காலை முதல் தொடர் கண்டன ஆர்ப்பாட்டம் நடைபெற்று வருகின்றது.

இதில் முதல் அமைச்சர் நாராயணசாமி, அமைச்சர்கள், சட்டமன்ற உறுப்பினர்கள் மற்றும் கூட்டணி கட்சி நிர்வாகிகள் ஆகியோர் கலந்துகொண்டு போராட்ட களத்தில் துணைநிலை ஆளுநருக்கு எதிராக போராடி வருகின்றனர். இந்நிலையில் 2-ம் நாள் இரவு நேரத்திலும் அங்கேயே உணவு உண்டு முதலமைச்சர் நாராயணசாமி, அமைச்சர் கந்தசாமி, சட்டமன்ற உறுப்பினர் ஜெயமூர்த்தி, ஜான்குமார், மாநில காங்கிரஸ் தலைவர் சுப்பிரமணியன், கூட்டணி கட்சி தலைவர்கள், தொண்டர்கள் ஆகியோர் அங்கேயே தார்பாய் விரித்து உறங்கினர்.

தொடர்போராட்டம் எனபதால் நிர்வாகிகள் அனைவரும் அங்கேயே தொடர்ந்து போராட்டம் நடத்தவும் முதலமைச்சர் கோரிக்கை வைத்துள்ளார். அப்போது செய்தியாளர்களிடம் பேசிய முதலமைச்சர் நாராயணசாமி, கிரண்பேடியை திரும்ப பெற வேண்டும் என்பதற்காக பிரதமர் நரேந்திரமோடியின் காதுகளுக்கு கேட்க வேண்டும் என்பதற்காக இந்த போராட்டத்தை அமைதியாக நடத்தி வருவதாக கூறினார்.

மேலும் துணைநிலை ஆளுநர் கிரண்பேடி உயிருக்கு பயந்து 3 அடுக்கு பாதுகாப்பு போடப்பட்டுள்ளதாகவும், அவரது மாளிகைக்கு பாதுகாப்பு போட்டு கொள்ளட்டும் ஆனால் பொதுமக்களை பாதிக்கும் வகையில் மற்ற இடங்களில் தடுப்புகள் அமைத்துள்ளது சரியல்ல என்று கூறிய அவர், கிரண்பேடியை திரும்ப பெரும் வரை எங்களது பலகட்ட போராட்டம் தொடரும் என முதலமைச்சர் நாராயணசாமி தெரிவித்துள்ளார்.

Leave a Reply

Your email address will not be published. Required fields are marked *