செய்திகள்

ஆம்பூரில் வேன் கவிழ்ந்து 2 பெண் தொழிலாளர்கள் பலி

ஆம்பூர், ஜூன் 12–

காலணி தொழிற்சாலை வேன் தலைகுப்புற கவிழ்ந்த விபத்தில், இரு பெண் தொழிலாளர்கள் உயிரிழந்த சம்பவம் ஆம்பூர் பகுதியில் சோகத்தை ஏற்படுத்தியுள்ளது.

வேலூர் மாவட்டம் ஆம்பூர் துத்திப்பட்டில் எம்.என்.இசட் என்ற தனியார் காலணி தயாரிக்கும் தொழிற்சாலை இயங்கி வருகிறது. இங்கு பணிபுரியும் பெண் தொழிலாளர்களை, தொழிற்சாலை வேன் மூலம் பணிக்கு அழைத்து வருவது வழக்கம்.

இந்நிலையில் வழக்கம்போல் இன்று வடகரை, வடச்சேரி ஆகிய கிராமங்களில் இருந்து பெண் தொழிலாளர்களை ஏற்றி கொண்டு வேன் வேகமாக வந்தது. மணியாரகுப்பம் என்ற இடத்தில் வந்தபோது ஒரு பெண் தொழிலாளியை ஏற்றுவதற்காக ஓட்டுநர் வேனை நிறுத்தி உள்ளார்.

2 பேர் பலி

ஆனால் பிரேக் பிடிக்காமல் ஓட்டுநரின் கட்டுபாட்டை இழந்த வேன், தறிகெட்டு ஓடி சாலையில் கவிழ்ந்து விபத்துக்குள்ளானது. இந்த விபத்தில் வேனில் சென்ற வடகரையை சேர்ந்த பெண் தொழிலாளி சிவகாமி மற்றும் மேல் ஈச்சம்பட்டு கிராமத்தை சேர்ந்த தொழிலாளி உஷா ஆகிய இருவரும் தலை நசுங்கி சம்பவ இடத்திலேயே பரிதாபமாக உயிரிழந்தனர்.

மேலும் 20க்கும் மேற்பட்ட பெண் தொழிலாளர்கள் படுகாயங்களுடன் சிகிச்சைக்காக ஆம்பூர் அரசு மருத்துவமனையில் அனுமதிக்கப்பட்டுள்ளனர். இந்த விபத்து குறித்து உமராபாத் காவல்துறையினர் வழக்குபதிவு செய்து உயிரிழந்த இரு பெண்களின் உடல்களை கைப்பற்றி பிரேத பரிசோதனைக்காக ஆம்பூர் அரசு மருத்துவமனைக்கு அனுப்பி வைத்து விசாரணை மேற்கொண்டு வருகின்றனர்.

பணிக்கு சென்ற பெண் தொழிலாளர்கள் இருவர் விபத்தில் உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.

Leave a Reply

Your email address will not be published. Required fields are marked *